ઇન્દોરમાં અચાનક રનવે પરથી પાછી ફરી ઇન્ડિગોની ફ્લાઇટ, 140 મુસાફરો હતા સવાર

સોમવારે ઇન્દોરથી ભુવનેશ્વર જઈ રહેલી ઇન્ડિગોની ફ્લાઇટ '6E 6332' (એરબસ A320 નિયો એરક્રાફ્ટ) રનવેની વચ્ચેથી પાછી ફરી હતી. એવું કહેવામાં આવી રહ્યું છે કે ફ્લાઇટ ટેકઓફ માટે તૈયાર હતી ત્યારે વિમાનમાં ટેકનિકલ ખામી સર્જાઈ હતી. તેમાં 140 મુસાફરો સવાર હતા. ફ્લાઇટના પાઇલટને ટેકનિકલ ખામીનો ખ્યાલ આવતા જ તેણે તરત જ ફ્લાઇટને રનવે પરથી ટર્મિનલ પર પાછી લાવી. શહેરના દેવી અહલ્યાબાઈ હોલકર એરપોર્ટના અધિકારીઓએ આ માહિતી આપી હતી. ઇન્દોર એરપોર્ટ પરથી મળેલી માહિતી મુજબ, વિમાનમાં એક નાની ટેકનિકલ ખામી સર્જાઈ હતી, જેના કારણે ફ્લાઇટને તાત્કાલિક પાછી બોલાવવામાં આવી હતી, જ્યાં લગભગ એક કલાક પછી વિમાનને રવાના કરવામાં આવ્યું હતું. આ સમય દરમિયાન, વિમાન રનવે પર એક કલાક સુધી ઊભું રહ્યું, જોકે, આ સમય દરમિયાન બધા મુસાફરો વિમાનમાં બેઠા રહ્યા અને ફ્લાઇટ ઠીક થવાની રાહ જોતા રહ્યા હતા. એરપોર્ટ ડિરેક્ટર વિપિનકાંત સેઠે જણાવ્યું હતું કે ઇન્ડિગો ફ્લાઇટ નંબર '6E 6332' ના પાઇલટને ટેકનિકલ ખામીનો ખ્યાલ આવ્યો જ્યારે વિમાન ટેક-ઓફ માટે રનવે તરફ જઈ રહ્યું હતું. તેમણે કહ્યું કે વિમાનને 'એપ્રોન' પર પાછું લાવવામાં આવ્યું હતું અને એન્જિનિયરોએ 'નાની ટેકનિકલ ખામી' સુધાર્યા પછી, વિમાનને ગંતવ્ય સ્થાન પર મોકલવામાં આવ્યું હતું.