ભારત અને યુકે વચ્ચે મુક્ત વેપાર કરાર (FTA) આજથી અમલમાં આવ્યો છે. બંને દેશોના ઉદ્યોગ અને વ્યાપાર સંગઠનોએ આ નવા પ્રકરણનું સ્વાગત કર્યું છે. તેમણે કહ્યું કે વ્યાપક ટેરિફ ઘટાડાથી બંને દેશો વચ્ચે માલ અને સેવાઓના દ્વિપક્ષીય પ્રવાહને વેગ મળશે અને વેપારને નવી ગતિ મળશે. ભારત અને યુકે વચ્ચે FTA ના અમલીકરણથી ઘણી ચીજવસ્તુઓના ભાવમાં ઘટાડો થશે .
ભારતના વડા પ્રધાન નરેન્દ્ર મોદી અને બ્રિટિશ વડા પ્રધાન કીર સ્ટાર્મરે ગયા વર્ષે જુલાઈમાં બંને દેશો વચ્ચે વ્યાપક આર્થિક અને વેપાર કરાર (CETA) પર હસ્તાક્ષર કર્યા હતા. આ કરારથી 2030 સુધીમાં બંને દેશો વચ્ચે વાર્ષિક વેપાર 48 અબજ પાઉન્ડના વર્તમાન સ્તરથી ઓછામાં ઓછો બમણો થવાનો અંદાજ છે. આનાથી લાંબા ગાળે બંને દેશોના કુલ સ્થાનિક ઉત્પાદન (GDP)માં દર વર્ષે આશરે 5 અબજ પાઉન્ડનો વધારો થશે.
પ્રધાનમંત્રી નરેન્દ્ર મોદીએ તેને ભારત-યુકે ભાગીદારી માટે એક મહત્વપૂર્ણ ક્ષણ ગણાવી. સોશિયલ મીડિયા પોસ્ટમાં, પીએમ મોદીએ લખ્યું, "વ્યાપક આર્થિક અને વેપાર કરાર (CETA) અને સામાજિક સુરક્ષા કરારના અમલીકરણથી આપણા આર્થિક સંબંધો વધુ ગાઢ બનશે. સાથે મળીને, આ કરારો આપણી સહિયારી મહત્વાકાંક્ષાઓને આપણા લોકો માટે નક્કર તકોમાં પરિવર્તિત કરશે. CETA આપણા ખેડૂતો, ઉદ્યોગસાહસિકો અને MSME ને નવી પ્રેરણા આપશે. ભારત અને યુકે સહિયારી સમૃદ્ધિ માટે સાથે મળીને કામ કરવાનું ચાલુ રાખશે."
