GST સુધારા ભારતની વિકાસગાથાને વેગ આપશે: પ્રધાનમંત્રી મોદી

રાષ્ટ્રને સંબોધિત કરતી વખતે, વડા પ્રધાન નરેન્દ્ર મોદીએ આવતીકાલથી GST બચત ઉત્સવ શરૂ થવાની જાહેરાત કરી છે. તેમણે દેશવાસીઓને આવતીકાલથી શરૂ થતા નવરાત્રી પર્વની શુભેચ્છાઓ પણ પાઠવી છે. પીએમ મોદીનું આ સંબોધન નવરાત્રીની પૂર્વ સંધ્યાએ આપવામાં આવી રહ્યું છે. GST દરોમાં ઘટાડો નવરાત્રીના પહેલા દિવસથી લાગુ કરવામાં આવશે અને તેનાથી મોટી સંખ્યામાં ઉત્પાદનોના ભાવમાં ઘટાડો થવાની અપેક્ષા છે. વડા પ્રધાન નરેન્દ્ર મોદી અગાઉ પણ સમયાંતરે રાષ્ટ્રને સંબોધિત કરતા રહ્યા છે. વર્ષ 2016 માં, તેમણે રાષ્ટ્રને સંબોધન દ્વારા નોટબંધીની જાહેરાત કરી હતી. તેવી જ રીતે, તેમણે રાષ્ટ્રને સંબોધનમાં કોવિડ દરમિયાન લોકડાઉનની પણ જાહેરાત કરી હતી. પીએમ મોદીએ કહ્યું કે જીએસટી સુધારાઓ ભારતની વિકાસગાથાને વેગ આપશે. પ્રધાનમંત્રી નરેન્દ્ર મોદીએ કહ્યું, "જ્યારે તમે 2014 માં અમને તક આપી, ત્યારે અમે જાહેર હિત અને રાષ્ટ્રીય હિતમાં જીએસટીને અમારી પ્રાથમિકતા બનાવી. બધાને સાથે લઈને, સ્વતંત્ર ભારતનો સૌથી મોટો કર સુધારો લાગુ કરવામાં આવ્યો. કેન્દ્ર અને રાજ્યના પ્રયાસોનું પરિણામ હતું કે દેશ ડઝનબંધ કરના જાળમાંથી મુક્ત થયો. એક રાષ્ટ્ર, એક કરનું સ્વપ્ન સાકાર થયું. સુધારા એક સતત પ્રક્રિયા છે. જ્યારે સમય બદલાય છે, જ્યારે દેશની જરૂરિયાતો બદલાય છે, ત્યારે આગામી પેઢીના સુધારા પણ એટલા જ મહત્વપૂર્ણ બની જાય છે. એટલા માટે આ નવા જીએસટી સુધારાઓ લાગુ કરવામાં આવી રહ્યા છે.