કડી છત્રાલ હાઈવે પર કચરાના ઢગલામાં લાગી આગ ભારે જહેમત બાદ આગ પર કાબુ જાનહાની ટળી

અફરાતફરી વચ્ચે હાઈવે પર ટ્રાફિક જામના દ્રશ્યો સર્જાયા; મહેસાણા જિલ્લાના કડી છત્રાલ હાઈવે પર પાંજરાપોળ નજીક આવેલી એક હોટલની પાસે સોમવારના રોજ સમી સાંજે અચાનક આગ લાગવાની ઘટના બનવા પામી હતી. જ્યાં રસ્તાની એક તરફ કચરાના ઢગલા નીચે આવેલી સાબરમતી ગેસની હેવી પાઈપલાઈનમાં એકાએક લીકેજ થતાં અચાનક જ આગ સળગી ઉઠતા સ્થાનિકોમાં નાસભાગ મચી જવા પામી હતી. જ્યાં આગના બનાવથી સમગ્ર વિસ્તારમાં અફરાતફરી જેવો માહોલ સર્જાયેલો જોવા મળ્યો હતો. આગ લાગવાની ઘટનાને જોઈ નજીકમાં રહેલા સ્થાનિકોએ તાત્કાલિક કડી નગરપાલિકાના ફાયર વિભાગ અને પોલીસને જાણ કરતા ફાયર બ્રિગેડની ટીમે ઘટનાસ્થળે પહોંચી જઈ મહા મુસીબતે આગ પર કાબુ મેળવ્યો હતો. પાંજરાપોળ નજીક બનેલી આગની ઘટનાને કારણે હાઈવે પર ભારે ટ્રાફિક જામ સર્જાઈ જવા પામ્યો હતો જ્યાં કડી પોલીસે તાત્કાલિકઘટનાસ્થળે પહોંચી ટ્રાફિક દૂર કરાવી રસ્તો ચાલુ કરાવ્યો હતો. ગેસ પાઈપ લાઈનમાં ભંગાણ થઈ લીકેજના કારણે આગ લાગી હોવાનું જાણી સાબરમતી ગેસ કંપનીના અધિકારીઓ પણ તાબડતોબ ઘટનાસ્થળે પહોંચી લીકેજ થયેલી ગેસ પાઈપનું સમારકામ શરૂ કરતા નજીકના વિસ્તારમાં રહેતા સ્થાનિકોએ રાહતનો શ્વાસ લીધો હતો. અત્રે ઉલ્લેખનીય છે કે પાઈપલાઈનમાં લીકેજ થયા બાદ લાગેલી આગમાં કોઈ પણ પ્રકારનું નુકશાન થયેલ નથી તેમજ સદનસીબે આગની ઘટનામાં કોઈ જાનહાની થયેલ નથી.