અમિત શાહે ગુજરાતમાં 3 નવા ફોજદારી કાયદાના અમલીકરણ અંગે સમીક્ષા બેઠક યોજી, CM પટેલ પણ હતા હાજર

કેન્દ્રીય ગૃહ અને સહકાર મંત્રી અમિત શાહે શુક્રવારે નવી દિલ્હીમાં ગુજરાતના મુખ્યમંત્રી ભૂપેન્દ્ર પટેલની હાજરીમાં રાજ્યમાં 3 નવા ફોજદારી કાયદાના અમલીકરણ અંગે સમીક્ષા બેઠકની અધ્યક્ષતા કરી હતી. આ બેઠકમાં ગુજરાતમાં પોલીસ, જેલ, અદાલતો, કાર્યવાહી અને ફોરેન્સિક સંબંધિત વિવિધ નવી જોગવાઈઓના અમલીકરણ અને વર્તમાન સ્થિતિની સમીક્ષા કરવામાં આવી હતી. આ બેઠકમાં ગુજરાતના ગૃહ રાજ્ય મંત્રી, કેન્દ્રીય ગૃહ સચિવ, ગુજરાતના મુખ્ય સચિવ અને પોલીસ મહાનિર્દેશક, નેશનલ ક્રાઈમ રેકોર્ડ બ્યુરો (NCRB)ના મહાનિર્દેશક અને કેન્દ્રીય ગૃહ મંત્રાલય અને રાજ્ય સરકારના ઘણા વરિષ્ઠ અધિકારીઓ ઉપસ્થિત રહ્યા હતા. શાહે ગુજરાત સરકારની પ્રશંસા કરી હતી બેઠકમાં ચર્ચા દરમિયાન શાહે જણાવ્યું હતું કે વડા પ્રધાન નરેન્દ્ર મોદી દ્વારા લાવવામાં આવેલા ત્રણ નવા ફોજદારી કાયદાનો આત્મા 3 વર્ષમાં એફઆઈઆરથી લઈને સુપ્રીમ કોર્ટમાં કોઈપણ કેસમાં ન્યાય આપવાની જોગવાઈમાં રહેલો છે. નવા ફોજદારી કાયદાઓના અમલીકરણ અંગે ગુજરાત સરકાર દ્વારા અત્યાર સુધી કરવામાં આવેલ કામગીરીની પ્રશંસા કરતા શાહે રાજ્ય સરકારને 30 એપ્રિલ, 2025 સુધીમાં તમામ કમિશનરેટમાં નવા કાયદાના 100 ટકા અમલીકરણની ખાતરી કરવા જણાવ્યું હતું. તેમણે કહ્યું કે ગુજરાતના મુખ્યમંત્રી દ્વારા માસિક, રાજ્યના ગૃહમંત્રી દ્વારા પખવાડિયામાં અને મુખ્ય સચિવ, અધિક મુખ્ય સચિવ (ગૃહ) અને પોલીસ મહાનિર્દેશકના સ્તરે સાપ્તાહિક તેની સમીક્ષા થવી જોઈએ. 'ગુજરાતએ CCTNS 2.0 અપનાવવું જોઈએ' અમિત શાહે જણાવ્યું હતું કે ગુજરાતે 10 વર્ષથી વધુની સજાવાળા કેસોમાં 92 ટકાથી વધુ ચાર્જશીટ સમયસર દાખલ કરવાનું પ્રશંસનીય કામ કર્યું છે. તેમણે કહ્યું કે બાકીના કેસોમાં કોર્ટમાંથી પરવાનગી લેવાની જોગવાઈનો ઉપયોગ સુનિશ્ચિત કરવા માટે કાયદાની સમીક્ષા કરવી જોઈએ. ગૃહમંત્રીએ કહ્યું કે, ગુજરાતે ઝીરો એફઆઈઆરને 100 ટકા એફઆઈઆરમાં ફેરવવાનું પ્રશંસનીય કામ કર્યું છે. તેમણે કહ્યું કે આવી સિસ્ટમ બનાવવી જોઈએ જેમાં ક્રાઈમ એન્ડ ક્રિમિનલ ટ્રેકિંગ નેટવર્ક અને સિસ્ટમ (સીસીટીએનએસ) દ્વારા બે રાજ્યો વચ્ચે એફઆઈઆર ટ્રાન્સફર કરી શકાય. ગુજરાતે CCTNS 2.0 અપનાવવું જોઈએ.