અમદાવાદ: દોહા-હોંગકોંગ ફ્લાઇટનું ઇમરજન્સી લેન્ડિંગ

અમદાવાદ એરપોર્ટ પર એક ફ્લાઇટનું ઇમરજન્સી લેન્ડિંગ કરવામાં આવ્યું છે. આ ફ્લાઇટ દોહાથી હોંગકોંગ જતી કતાર એરવેઝની ફ્લાઇટ હોવાનું કહેવાય છે. પ્લેનનું ઇમરજન્સી લેન્ડિંગ કરવામાં આવ્યું હતું. હાલમાં બધા મુસાફરો સુરક્ષિત છે. અહેવાલો અનુસાર, મોટી ટેકનિકલ ખામીને કારણે ઇમરજન્સી લેન્ડિંગ કરવામાં આવ્યું હતું. ઘટના દરમિયાન એરપોર્ટ પર પ્રી-ઇમરજન્સી જાહેર કરવામાં આવી હતી, જે બાદમાં ઇમરજન્સી લેન્ડિંગ બાદ ઉઠાવી લેવામાં આવી હતી. આ અંગે માહિતી આપતાં, સરદાર વલ્લભભાઈ પટેલ આંતરરાષ્ટ્રીય વિમાનમથકના પ્રવક્તાએ જણાવ્યું હતું કે, "દોહા (DOH) થી હોંગકોંગ (HKG) જઈ રહેલા વિમાનમાં ટેકનિકલ ખામી સર્જાતાં, ૧૪ ઓક્ટોબર ૨૦૨૫ ના રોજ બપોરે ૨:૧૨ વાગ્યે અમદાવાદ એરપોર્ટ પર વિમાનના ઉતરાણ માટે સંપૂર્ણ કટોકટી જાહેર કરવામાં આવી હતી. વિમાન બપોરે ૨:૩૨ વાગ્યે સુરક્ષિત રીતે ઉતર્યું અને બપોરે ૨:૩૮ વાગ્યે સંપૂર્ણ કટોકટી હટાવી લેવામાં આવી. એરપોર્ટ કામગીરી પર કોઈ અસર પડી નથી. SVPIA મુસાફરો અને સ્ટાફની સલામત કામગીરી અને સલામતી માટે પ્રતિબદ્ધ છે." કતાર એરવેઝની સત્તાવાર વેબસાઇટ અનુસાર, ફ્લાઇટ નંબર QR816 એ દોહાના હમ્માદ ઇન્ટરનેશનલ એરપોર્ટથી સવારે 9 વાગ્યે ઉડાન ભરી હતી અને બપોરે 2:40 વાગ્યે અમદાવાદના સરદાર વલ્લભભાઈ પટેલ ઇન્ટરનેશનલ એરપોર્ટ (SVPIA) તરફ વાળવામાં આવી હતી. "ઉડાન દરમિયાન કોઈ ટેકનિકલ ખામી સર્જાઈ હોવાથી, કતાર એરવેઝની દોહા-હોંગકોંગ ફ્લાઇટને સાવચેતીના પગલા તરીકે અમદાવાદ તરફ વાળવામાં આવી હતી. વિમાન બપોરે 2:40 વાગ્યે સરદાર વલ્લભભાઈ પટેલ ઇન્ટરનેશનલ એરપોર્ટ પર સુરક્ષિત રીતે ઉતરાણ કર્યું," એક એરપોર્ટ અધિકારીએ જણાવ્યું. તેમણે કહ્યું કે એરપોર્ટ પર વિમાનનું સંપૂર્ણ નિરીક્ષણ કર્યા પછી ફ્લાઇટ ફરી શરૂ કરવાનો નિર્ણય લેવામાં આવશે.