'ઓપરેશન સિંદૂર'ની સફળતા બાદ હવે સરકારે સર્વપક્ષીય બેઠક બોલાવી

પહેલગામમાં થયેલા આતંકવાદી હુમલા બાદ ભારતીય સેનાએ પીઓકે અને પાકિસ્તાનમાં આતંકવાદી છાવણીઓ સામે ઓપરેશન સિંદૂર શરૂ કર્યું હતું. આમાં, 9 આતંકવાદી ઠેકાણાઓને નિશાન બનાવીને હુમલા કરવામાં આવ્યા હતા. 'ઓપરેશન સિંદૂર'ની સફળતા બાદ હવે સરકારે સર્વપક્ષીય બેઠક બોલાવી છે. વિપક્ષના ઘણા મોટા નેતાઓએ પણ તેમાં ભાગ લીધો છે. સરકાર અને વિપક્ષી નેતાઓ વચ્ચે એક અઠવાડિયામાં આ બીજી બેઠક છે. સરકાર વતી આ સર્વપક્ષીય બેઠકમાં કેન્દ્રીય મંત્રીઓ રાજનાથ સિંહ, અમિત શાહ, એસ જયશંકર, જેપી નડ્ડા અને નિર્મલા સીતારમણે ભાગ લીધો હતો. કોંગ્રેસ વતી રાહુલ ગાંધી અને મલ્લિકાર્જુન ખડગેએ આ બેઠકમાં હાજરી આપી હતી. આ ઉપરાંત, તૃણમૂલ કોંગ્રેસના સુદીપ બંદોપાધ્યાય અને ડીએમકેના ટીઆર બાલુએ આ બેઠકમાં હાજરી આપી હતી. દેશના સંરક્ષણ પ્રધાન રાજનાથ સિંહે આ બેઠકની અધ્યક્ષતા કરી હતી. જમ્મુ અને કાશ્મીરના પહેલગામમાં 26 નાગરિકોની હત્યાના બે અઠવાડિયા પછી 'ઓપરેશન સિંદૂર' હેઠળ આ લશ્કરી હુમલાઓ કરવામાં આવ્યા હતા. અગાઉ, સરકારે પહેલગામ હુમલા વિશે તમામ પક્ષોના નેતાઓને માહિતી આપવા માટે 24 એપ્રિલે સર્વપક્ષીય બેઠક બોલાવી હતી.