દિલ્હીના દરિયાગંજ વિસ્તારમાં એક ઇમારત ધરાશાયી, ત્રણ લોકોના મોત

રાજધાની દિલ્હીના દરિયાગંજ વિસ્તારમાં ધરાશાયી થયેલી એક ઇમારતના કાટમાળ નીચે દટાઈ જવાથી ત્રણ લોકોના મોત થયાના અહેવાલ છે. દરિયાગંજ રાજધાનીના ખૂબ જ ભીડભાડવાળા વિસ્તાર છે. જૂની દિલ્હીનો આ વિસ્તાર ખૂબ જ ગીચ વસ્તી ધરાવતો છે. હાલમાં, વિગતવાર અહેવાલની રાહ જોવાઈ રહી છે. મળતી માહિતી મુજબ, દિલ્હીના દરિયાગંજ વિસ્તારમાં બુધવારે બપોરે ૧૨.૧૪ વાગ્યે એક જૂનું જર્જરિત મકાન ધરાશાયી થયું હતું. માહિતી મળતાં જ પોલીસ સાથે ફાયર બ્રિગેડની ચાર ગાડીઓ ઘટનાસ્થળે પહોંચી ગઈ હતી. રાહત અને બચાવ કાર્ય શરૂ કરવામાં આવ્યું છે. સદભાવના પાર્ક નજીક શહેરની દિવાલની સીમા પર આવેલી આ ઇમારત ઘણી જૂની હતી. ઇમારતમાં હાજર ત્રણ મજૂરોના ઘટનાસ્થળે જ મોત થયા હતા. ત્રણેયના નામ ઝુબૈર, ગુલસાગર અને તૌફિક છે. ત્રણેયને ઘટનાસ્થળેથી LNJP હોસ્પિટલમાં લઈ જવામાં આવ્યા હતા, જ્યાં ડોક્ટરોએ તેમને મૃત જાહેર કર્યા હતા. ડીડીએમએ સહિત મ્યુનિસિપલ કોર્પોરેશનના અધિકારીઓએ ઘટના સ્થળે રાહત અને બચાવ કાર્ય શરૂ કરી દીધું છે. કાટમાળ નીચે હજુ પણ વધુ લોકો ફસાયેલા હોવાની શક્યતા છે.