બીકેસી સ્થિત નીતા મુકેશ અંબાણી કલ્ચરલ સેન્ટરમાંથી બે શંકાસ્પદ લોકોની અટકાયત કરવામાં આવી હતી. સૂત્રોના જણાવ્યા અનુસાર, એક શંકાસ્પદે પ્રધાનમંત્રી કાર્યાલય (પીએમઓ)નો અધિકારી હોવાનો દાવો કર્યો હતો. તપાસ દરમિયાન, એવું બહાર આવ્યું કે તેની પાસે નકલી પીએમઓ ઓળખ કાર્ડ હતું. સુરક્ષા તપાસ દરમિયાન ઓળખ કાર્ડ નકલી હોવાનું માલૂમ પડતાં મુંબઈ પોલીસે કાર્યવાહી કરી હતી. તેની સાથે રહેલા બોડીગાર્ડ પાસે પણ બંદૂક હોવાનું જાણવા મળ્યું હતું.
મુંબઈ ક્રાઈમ બ્રાન્ચ આ મામલાની વધુ તપાસ કરી રહી છે. નકલી ઓળખપત્ર અને હથિયારો સાથે સ્થળ પર પ્રવેશવા પાછળના હેતુની તપાસ કરવામાં આવી રહી છે. આજે, વડા પ્રધાન નરેન્દ્ર મોદી બીકેસીમાં જિયો વર્લ્ડ સેન્ટર ખાતે ગ્લોબલ ફિનટેક ફેસ્ટ 2026નું ઉદ્ઘાટન કરશે અને સભાને સંબોધિત કરશે.
મુંબઈ પોલીસના જણાવ્યા અનુસાર, ધરપકડ કરાયેલ વ્યક્તિ ગઈકાલે (૭ સપ્ટેમ્બર) નકલી ઓળખપત્ર સાથે સ્થળમાં પ્રવેશવાનો પ્રયાસ કરી રહ્યો હતો. આ દરમિયાન મુંબઈ પોલીસે તેને જોયો અને તેની તપાસ કરતાં જાણવા મળ્યું કે તેની પાસે રહેલા ઓળખપત્રો નકલી હતા. ત્યારબાદ તેની અને તેના બોડીગાર્ડ વિરુદ્ધ બીકેસી પોલીસ સ્ટેશનમાં કેસ નોંધવામાં આવ્યો હતો. ક્રાઈમ બ્રાન્ચ વધુ તપાસ કરી રહી છે. ધરપકડ કરાયેલ વ્યક્તિની ઓળખ રોહન પારેખ તરીકે થઈ છે.
મુંબઈ પોલીસનું કહેવું છે કે, મુંબઈમાં જ્યાં વડા પ્રધાન નરેન્દ્ર મોદી એક કાર્યક્રમમાં હાજરી આપવાના હતા ત્યાંથી બે લોકોની અટકાયત કરવામાં આવી છે. તેમાંથી એક પાસેથી બંદૂક મળી આવી છે. મુંબઈ પોલીસે બીકેસી સ્થિત નીતા મુકેશ અંબાણી કલ્ચરલ સેન્ટર (એનએમએસીસી)માંથી એક વ્યક્તિની અટકાયત કરી હતી, જે પોતાને વડા પ્રધાન કાર્યાલયનો અધિકારી હોવાનો દાવો કરી રહ્યો હતો. અટકાયત કરાયેલ વ્યક્તિ 24 વર્ષનો હોવાનું કહેવાય છે. તેની સાથે એક બોડીગાર્ડ પણ હતો, જે બંદૂક લઈને આવ્યો હતો. મુંબઈ ક્રાઈમ બ્રાન્ચ હવે આ મામલાની વધુ તપાસ કરી રહી છે.
