ગોવાના શિરગાંવમાં નાસભાગ મચી, 7 લોકોના મોત: 80 થી વધુ ઘાયલ

શનિવારે વહેલી સવારે ઉત્તર ગોવાના શિરગાંવ ગામમાં એક મંદિર ઉત્સવ દરમિયાન ભાગદોડ મચી જવાથી ઓછામાં ઓછા સાત લોકોના મોત થયા હતા અને 80 થી વધુ લોકો ઘાયલ થયા હતા. આ ઘટના શ્રી લૈરાઈ દેવી મંદિરમાં બની હતી. ભાગદોડનું કારણ સમજાવતા, એક વરિષ્ઠ પોલીસ અધિકારીએ જણાવ્યું કે લગભગ 30,000 થી 40,000 ભક્તો ઉત્સવ માટે ભેગા થયા હતા, જેમાં ઘણા મંદિરની નજીક ઢાળ પર ઉભા હતા. પોલીસ મહાનિર્દેશક આલોક કુમારે પીટીઆઈને જણાવ્યું હતું કે થોડા લોકો ઢાળ પર પડી ગયા, જેના કારણે અન્ય લોકો એકબીજા પર પડી ગયા. ગોવા, મહારાષ્ટ્ર અને કર્ણાટકના હજારો ભક્તો શ્રી લૈરાઈ દેવી મંદિરમાં વાર્ષિક ઉત્સવમાં હાજરી આપે છે. મુખ્યમંત્રી પ્રમોદ સાવંતે ઉત્તર ગોવા જિલ્લા હોસ્પિટલમાં ઘાયલોની મુલાકાત લીધી. સાવંતે X પર એક પોસ્ટમાં જણાવ્યું હતું કે તેમને વડા પ્રધાન નરેન્દ્ર મોદીનો ફોન આવ્યો છે, જેમણે તેમનો સંપૂર્ણ ટેકો આપ્યો હતો. ગોવાના મુખ્યમંત્રીએ એવી પણ જાહેરાત કરી હતી કે મંદિરમાં ભાગદોડની તપાસ કરવામાં આવશે. ઘટનાસ્થળે પત્રકારો સાથે વાત કરતા સાવંતે કહ્યું કે, મેં આ ઘટનાની વિગતવાર તપાસ માટે કહ્યું છે. ગોવાના આરોગ્ય મંત્રી વિશ્વજીત રાણેએ જણાવ્યું કે 80 જેટલા લોકો ઘાયલ થયા છે અને તેમની સારવાર ચાલી રહી છે.