ગઈકાલે સંસદમાં પીએમ મોદી પર હુમલો થવાનો હતો', સ્પીકરે કર્યો મોટો દાવો

લોકસભાના અધ્યક્ષ ઓમ બિરલાએ ગૃહમાં પીએમ મોદીના ભાષણને મુલતવી રાખવા અંગે એક મહત્વપૂર્ણ દાવો કર્યો છે. પ્રધાનમંત્રી નરેન્દ્ર મોદીનું ભાષણ બુધવારે સાંજે 5 વાગ્યે થવાનું હતું, પરંતુ છેલ્લી ઘડીએ તે મુલતવી રાખવામાં આવ્યું. આનું કારણ આજે (ગુરુવારે) બહાર આવ્યું છે. લોકસભાના અધ્યક્ષ ઓમ બિરલાએ પોતે અધ્યક્ષ સ્થાનેથી જણાવ્યું હતું કે પીએમ મોદી સાથે કોઈ અણધારી ઘટના બનવાની શક્યતા છે, તેથી જ તેમણે પીએમ મોદીને ગૃહમાં હાજર ન રહેવા વિનંતી કરી છે. લોકસભાની કાર્યવાહી દરમિયાન, સ્પીકર ઓમ બિરલાએ એક બોલ્ડ દાવો કર્યો હતો કે ગઈકાલે ગૃહમાં પીએમ મોદી પર હુમલો થવાનો હતો. "સંસદમાં કોઈ અણધારી ઘટના બની શકે છે. પરિસ્થિતિને ધ્યાનમાં રાખીને, મેં પીએમ મોદીને ગૃહમાં ન આવવા વિનંતી કરી, અને તેમણે તેનું પાલન કર્યું." સ્પીકરે કોંગ્રેસના સાંસદોને ચેતવણી આપી હતી કે જો તેઓ પોસ્ટરો લાવશે, તો સંસદ આગળ વધી શકશે નહીં. ઉલ્લેખનીય છે કે બુધવારે વિપક્ષી સભ્યો દ્વારા કરવામાં આવેલા સૂત્રોચ્ચારને કારણે લોકસભાની કાર્યવાહી વારંવાર ખોરવાઈ હતી. આ દરમિયાન, લોકસભા અધ્યક્ષ ઓમ બિરલાએ ધ્વનિ મતદાન માટે વિનંતી કરી હતી, ત્યારબાદ પીએમ મોદીના ભાષણ વિના પ્રસ્તાવ પસાર કરવામાં આવ્યો હતો. પીએમ મોદી બુધવારે રાષ્ટ્રપતિના અભિભાષણ પર આભાર પ્રસ્તાવનો જવાબ આપવાના હતા, પરંતુ વિપક્ષી સભ્યો દ્વારા વારંવાર વિક્ષેપો અને સૂત્રોચ્ચારને કારણે, અધ્યક્ષે લોકસભા સ્થગિત કરી દીધી હતી. આ અંગે કોંગ્રેસના સાંસદ પ્રિયંકા ગાંધી વાડ્રાએ કહ્યું, "વડાપ્રધાન સ્પીકરની પાછળ છુપાઈ રહ્યા છે. ગઈકાલે તેમનામાં ગૃહમાં આવવાની હિંમત નહોતી કારણ કે સ્પીકરની સામે ત્રણ મહિલાઓ ઉભી હતી. કોઈ ચર્ચા થઈ રહી નથી કારણ કે સરકાર એવું ઇચ્છતી નથી કે તે થાય."