ઓડિશા: બેંગલુરુ-કામખ્યા એસી એક્સપ્રેસ અકસ્માતમાં એક વ્યક્તિનું મોત, 8 ઘાયલ

ઓડિશાના કટક જિલ્લામાં રવિવારે કામાખ્યા એક્સપ્રેસ પાટા પરથી ઉતરી ગઈ. આ અકસ્માતમાં એક વ્યક્તિનું મોત થયું હતું અને 8 લોકો ઘાયલ થયા હતા. આ માહિતી કટકના ડીએમ દ્વારા આપવામાં આવી છે. દરમિયાન, અકસ્માતની તપાસ ચાલી રહી છે. આ ટ્રેન બેંગલુરુથી કામાખ્યા જઈ રહી હતી. માંગુલી નજીક નિર્ગુન્ડી ખાતે ટ્રેનના 11 ડબ્બા પાટા પરથી ઉતરી ગયા હતા. અકસ્માતની માહિતી મળતા જ NDRF સાથે રાહત ટ્રેન ઘટનાસ્થળે મોકલવામાં આવી હતી. રેલવે અને વહીવટી અધિકારીઓ ઘટનાસ્થળે પહોંચી ગયા હતા અને રાહત કાર્ય શરૂ કરવામાં આવ્યું હતું. ઉપરાંત, ફસાયેલા મુસાફરોને તેમના ગંતવ્ય સ્થાન પર મોકલવા માટે જરૂરી વ્યવસ્થા કરવામાં આવી રહી છે. આ અકસ્માત બાદ, આસામના મુખ્યમંત્રી હિમંતા બિસ્વા શર્માએ કહ્યું કે ઓડિશામાં ટ્રેન અકસ્માત બાદ તેમનું કાર્યાલય ઓડિશા સરકારના સંપર્કમાં છે. "ઓડિશામાં ૧૨૫૫૧ કામાખ્યા એક્સપ્રેસ સાથે બનેલી ઘટનાથી હું વાકેફ છું. આસામના મુખ્યમંત્રી કાર્યાલય ઓડિશા સરકાર અને રેલવેના સંપર્કમાં છે. અમે અસરગ્રસ્ત દરેક વ્યક્તિનો સંપર્ક કરીશું," શર્માએ 'X' પરની પોસ્ટમાં જણાવ્યું હતું.