શ્રીલંકાના પૂર્વ રાષ્ટ્રપતિ રાનિલ વિક્રમસિંઘેની ધરપકડ, જાણો શું છે સમગ્ર મામલો

શ્રીલંકાના ભૂતપૂર્વ રાષ્ટ્રપતિ રાનિલ વિક્રમસિંઘેની શુક્રવારે કોલંબોમાં ક્રિમિનલ ઇન્વેસ્ટિગેશન ડિપાર્ટમેન્ટ (CID) દ્વારા ધરપકડ કરવામાં આવી હતી જ્યારે તેઓ તેમના રાષ્ટ્રપતિ કાર્યકાળ દરમિયાન વ્યક્તિગત મુસાફરી માટે જાહેર ભંડોળના દુરુપયોગના આરોપોના સંદર્ભમાં તેમનું નિવેદન નોંધાવવા આવ્યા હતા. સ્થાનિક મીડિયા અહેવાલો અનુસાર, રાનિલ વિક્રમસિંઘે શુક્રવારે સવારે નાણાકીય ગુના તપાસ વિભાગ (FCID) સમક્ષ પોતાનું નિવેદન નોંધાવવા પહોંચ્યા હતા. FCIDના એક અધિકારીએ જણાવ્યું હતું કે, "અમે તેમને કોલંબો ફોર્ટ મેજિસ્ટ્રેટ સમક્ષ રજૂ કરી રહ્યા છીએ. રાજ્યના સંસાધનોનો વ્યક્તિગત ઉપયોગ કરવાના આરોપસર તેમની ધરપકડ કરવામાં આવી છે." 2023 માં હવાનાથી પરત ફરતી વખતે વિક્રમસિંઘે લંડનની ખાનગી યાત્રા કરી હતી. આ દરમિયાન, તેઓ અને તેમની પત્ની મૈત્રી વિક્રમસિંઘે યુનિવર્સિટી ઓફ વોલ્વરહેમ્પ્ટન ખાતે એક સમારોહમાં હાજરી આપી હતી. આ યાત્રા શ્રીલંકાના જાહેર સંસાધનોનો દુરુપયોગ માનવામાં આવે છે. જો કે, ભૂતપૂર્વ રાષ્ટ્રપતિ હંમેશા કહેતા આવ્યા છે કે તેમની પત્નીએ તેમની યાત્રાનો ખર્ચ પોતે ઉઠાવ્યો હતો અને તેમાં કોઈ સરકારી ભંડોળનો ઉપયોગ કરવામાં આવ્યો ન હતો. પરંતુ પોલીસના ગુનાહિત તપાસ વિભાગ (CID) નો આરોપ છે કે વિક્રમસિંઘેએ તેમની અંગત યાત્રા માટે સરકારી ભંડોળનો ઉપયોગ કર્યો હતો અને રાજ્યએ તેમના સુરક્ષા કર્મચારીઓને પણ ચૂકવણી કરી હતી. આ કેસમાં, શુક્રવારે સવારે તેમને નિવેદન નોંધાવવા માટે બોલાવવામાં આવ્યા હતા, ત્યારબાદ તેમની ધરપકડ કરવામાં આવી હતી.