શીખ વિરોધી રમખાણોના કેસમાં તિહાર જેલમાં બંધ કોંગ્રેસના પૂર્વ સાંસદ સજ્જન કુમારનું અવસાન

1984ના શીખ વિરોધી રમખાણોના કેસમાં દોષિત ઠેરવવામાં આવેલા કોંગ્રેસના ભૂતપૂર્વ સાંસદ સજ્જન કુમારનું 80 વર્ષની વયે અવસાન થયું છે. સમાચાર એજન્સી ANI અનુસાર, સજ્જન કુમારને દિલ્હીની સફદરજંગ હોસ્પિટલમાં મૃત હાલતમાં લાવવામાં આવ્યા હતા. 1984ના શીખ વિરોધી રમખાણો સાથે સંબંધિત બે કેસમાં દોષિત ઠેરવવામાં આવ્યા બાદ તેઓ તિહાર જેલમાં આજીવન કેદની સજા ભોગવી રહ્યા હતા.


દિલ્હી કેન્ટોનમેન્ટના પાલમ કોલોનીમાં પાંચ શીખોની હત્યા બાદ ગુરુદ્વારા સળગાવી દેવાના કેસમાં સજ્જન કુમારને દોષિત ઠેરવવામાં આવ્યા હતા. 17 ડિસેમ્બર, 2018 ના રોજ દિલ્હી હાઈકોર્ટે તેમને આજીવન કેદની સજા ફટકારી હતી. ત્યારબાદ, સપ્ટેમ્બર 2023 માં, રાઉઝ એવન્યુ કોર્ટે તેમને ત્રણ શીખોની સુલતાનપુરી હત્યા કેસમાં નિર્દોષ જાહેર કર્યા. રમખાણોમાં સીબીઆઈની મુખ્ય સાક્ષી ચામ કૌરે આરોપ લગાવ્યો હતો કે સજ્જન ભીડને ઉશ્કેરી રહ્યો હતો.

નોંધનીય છે કે સરદાર જસવંત સિંહ અને તેમના પુત્ર તરુણદીપ સિંહની 1 નવેમ્બર, 1984ના રોજ સરસ્વતી વિહારમાં હત્યા કરવામાં આવી હતી. તોફાનીઓએ તેમના પર લોખંડના સળિયા અને લાકડીઓથી હુમલો કર્યો હતો. ત્યારબાદ બે શીખોને જીવતા સળગાવી દેવામાં આવ્યા હતા. 12 ફેબ્રુઆરી, 2025ના રોજ તેમને દોષિત ઠેરવવામાં આવ્યા હતા અને 25 ફેબ્રુઆરીએ તેમને આજીવન કેદની સજા ફટકારવામાં આવી હતી.