ટ્રેનના તમામ કોચ અને એન્જિનમાં CCTV કેમેરા લગાવવામાં આવશે, રેલ મંત્રાલયનો મોટો નિર્ણય

ભારતીય રેલ્વેએ મુસાફરોની સુરક્ષા સુનિશ્ચિત કરવા માટે એક મોટું પગલું ભર્યું છે. રેલ્વેએ તમામ પેસેન્જર કોચમાં સીસીટીવી કેમેરા લગાવવાનો નિર્ણય લીધો છે. રેલ્વે મંત્રી અશ્વિની વૈષ્ણવે આ જાહેરાત કરી છે. તેમણે કહ્યું કે મુસાફરોની સુરક્ષાને પ્રાથમિકતા આપતા, ભારતીય રેલ્વેના તમામ 74,000 કોચ અને 15,000 એન્જિનમાં સીસીટીવી કેમેરા લગાવવા માટે સૂચના આપવામાં આવી છે. શનિવારે રેલવે મંત્રી અશ્વિની વૈષ્ણવ અને કેન્દ્રીય રેલવે રાજ્યમંત્રી રવનીત સિંહ બિટ્ટુ દ્વારા ઉત્તર રેલવેમાં પાયલોટ ધોરણે લગાવવામાં આવેલા સીસીટીવી કેમેરાના ફાયદાઓની સમીક્ષા કર્યા બાદ આ મહત્વપૂર્ણ નિર્ણય લેવામાં આવ્યો હતો. મંત્રાલય દ્વારા જારી કરાયેલા એક નિવેદન અનુસાર, મુસાફરોની ગોપનીયતા સુનિશ્ચિત કરવા માટે, સીસીટીવી કેમેરા મુખ્યત્વે દરવાજા પાસે, સામાન્ય ટ્રાફિકવાળા વિસ્તારોમાં સ્થાપિત કરવામાં આવશે.