બોલિવૂડ અભિનેતા આમિર ખાનના ભત્રીજા ઇમરાન ખાન અને તુષાર ગાંધીની મુંબઈમાં અટકાયત

બોલિવૂડ અભિનેતા આમિર ખાનના ભત્રીજા ઇમરાન ખાન અને મહાત્મા ગાંધીના પ્રપૌત્ર તુષાર ગાંધીની મુંબઈમાં પોલીસે અટકાયત કરી છે. વાસ્તવમાં, અભિનેતા આમિર ખાનના ભત્રીજા એવા અભિનેતા ઇમરાન ખાન વિરોધ પ્રદર્શનમાં ભાગ લેવા માટે મુંબઈના ઓગસ્ટ ક્રાંતિ મેદાન પહોંચ્યા હતા. પોલીસે ઇમરાન ખાનની અટકાયત કરી છે. ઓગસ્ટ ક્રાંતિ મેદાન અને તેની આસપાસ ભારે પોલીસ બંદોબસ્ત ગોઠવી દેવામાં આવ્યો છે. જેમ જેમ પ્રદર્શનકારીઓ વિરોધ પ્રદર્શનમાં જોડાવા માટે પહોંચી રહ્યા છે, તેમ તેમ પોલીસ તેમને અટકાયતમાં લઈ રહી છે.

મુંબઈના ઓગસ્ટ ક્રાંતિ મેદાનમાં આજે યોજાનાર વિરોધ પ્રદર્શન પહેલા પોલીસે મહાત્મા ગાંધીના પ્રપૌત્ર તુષાર ગાંધીની અટકાયત કરી હતી. તુષાર ગાંધીને ડીએન નગર પોલીસ સ્ટેશન લઈ જવામાં આવ્યા હતા. શિવસેના (યુબીટી)ના નેતાઓ આદિત્ય ઠાકરે અને સંજય રાઉત તેમના સમર્થનમાં ડીએન નગર પોલીસ સ્ટેશન પહોંચ્યા હતા. 

ઉલ્લેખનીય છે કે ઓગસ્ટ ક્રાંતિ મેદાન ખાતે પ્રસ્તાવિત વિરોધ પ્રદર્શન માટે મુંબઈ પોલીસે કડક સુરક્ષા વ્યવસ્થા કરી છે, અને ભાગ લેવા આવતા લોકોની અટકાયત કરવામાં આવી રહી છે. શિવસેનાના નેતાઓનું કહેવું છે કે જ્યાં સુધી પોલીસ તુષાર ગાંધીને મુક્ત નહીં કરે ત્યાં સુધી તેઓ પોલીસ સ્ટેશનમાં જ રહેશે.

જંતર-મંતર પર ચાલી રહેલા આંદોલનના સમર્થનમાં આજે બપોરે 3:30 વાગ્યે મુંબઈના ઓગસ્ટ ક્રાંતિ મેદાનમાં "વી ધ પીપલ ઓફ ઇન્ડિયા" ના બેનર હેઠળ વિરોધ પ્રદર્શનનું આયોજન કરવામાં આવ્યું છે. આ વિરોધ પ્રદર્શનનું નેતૃત્વ તુષાર ગાંધી કરવાના હતા. પોલીસે આજે સવારે તેમની અટકાયત કરી હતી.