પાકિસ્તાનમાં ધોળા દિવસે મોટી ઘટના, અજાણ્યા હુમલાખોરોએ પાંચ લોકોની ગોળી મારીને હત્યા

પાકિસ્તાનના બલુચિસ્તાનમાં અજાણ્યા હુમલાખોરોએ ધોળા દિવસે પાંચ લોકોની ગોળી મારીને હત્યા કરી દીધી, જેનાથી સમગ્ર વિસ્તારમાં ભયનો માહોલ છવાઈ ગયો. ARY ન્યૂઝ અનુસાર, બલુચિસ્તાનના હરનાઈ જિલ્લાના શહરગ વિસ્તારમાં અજાણ્યા સશસ્ત્ર માણસોએ સ્થાનિકો પર અંધાધૂંધ ગોળીબાર કર્યો, જેમાં પાંચ લોકો માર્યા ગયા. આ ઘટનામાં અન્ય ત્રણ લોકો ઘાયલ પણ થયા. પોલીસના જણાવ્યા અનુસાર, સશસ્ત્ર માણસોએ શેખ મુસા બાબા ચોક પાસે એક અસ્થાયી ચેકપોઇન્ટ બનાવી હતી અને ત્યાંથી પસાર થતા લોકોના કોમ્પ્યુટરાઇઝ્ડ નેશનલ આઇડેન્ટિટી કાર્ડ (CNIC) તપાસી રહ્યા હતા.

અહેવાલ મુજબ કેટલાક સ્થાનિક લોકોએ તપાસનો વિરોધ કર્યો હતો, જેના કારણે હુમલાખોરો અને ભીડ વચ્ચે ઝઘડો થયો હતો. ત્યારબાદ બંદૂકધારીઓએ ભીડ પર અંધાધૂંધ ગોળીબાર કર્યો . ચાર લોકોના ઘટનાસ્થળે જ મોત થયા હતા, જ્યારે ગંભીર રીતે ઘાયલ થયેલા એક વ્યક્તિનું ક્વેટા જતા રસ્તામાં મોત થયું હતું. મૃતકોની ઓળખ ઝમાન શાહ, ઝિયા-ઉલ-હક, અબ્દુલ કાહિર, જમિયત ઉલેમા-એ-ઇસ્લામના નેતા મૌલવી ઝાહિદ શાહ અને ઇકરામુલ્લાહ શાહ તરીકે થઈ છે. ઘાયલોમાં નાસિર શાહ, મુલ્લા સમદ અને સાકિબ શાહનો સમાવેશ થાય છે.

સોમવારે કરાચીમાં એક નવપરિણીત યુગલની ગોળી મારીને હત્યા કરવામાં આવી હતી. આ હુમલો ત્યારે થયો જ્યારે યુગલ તેમના લગ્નને કાયદેસર બનાવીને કોર્ટમાંથી પરત ફરી રહ્યું હતું. ડોન અખબારના અહેવાલ મુજબ, જ્યારે યુગલ કોર્ટમાંથી બહાર નીકળ્યું, ત્યારે હુમલાખોરોએ તેમની કારનો પીછો કર્યો અને સૌદાબાદ વિસ્તારમાં આરસીડી ગ્રાઉન્ડ પાસે તેમને રોક્યા. ત્યારબાદ હુમલાખોરોએ ગોળીબાર કર્યો. કોરંગીના વરિષ્ઠ પોલીસ અધિક્ષક ફિદા હુસૈન જાનવારીએ જણાવ્યું હતું કે બંનેનું ઘટનાસ્થળે જ મોત થયું હતું.