આસામના દિમા હસાઓ જિલ્લામાં કોલસાની ખાણમાં ફસાયેલા કામદારોને શોધવા માટે બચાવ કામગીરી રવિવારે સાતમા દિવસે પણ ચાલુ રહી હતી. આ ખાણમાં ફસાયેલા ચાર મજૂરોના મૃતદેહ અત્યાર સુધીમાં બહાર કાઢવામાં આવ્યા છે, જ્યારે પાંચ લોકોની શોધખોળ ચાલુ છે. અધિકારીઓએ આ અંગે માહિતી આપી હતી. રાજ્યના ખાણ અને ખનિજ પ્રધાન કૌશિક રાયે જણાવ્યું હતું કે ખાણમાંથી પાણી દૂર કરવાનું કામ ચાલી રહ્યું છે અને આશા છે કે આ પ્રક્રિયા ટૂંક સમયમાં અંતિમ તબક્કામાં પહોંચી જશે. તમને જણાવી દઈએ કે 6 જાન્યુઆરીએ ગુવાહાટીથી લગભગ 250 કિલોમીટર દૂર ઉમરાંગસો વિસ્તારમાં આવેલી કોલસાની ખાણમાં અચાનક પાણી ભરાઈ ગયું હતું. આ અકસ્માત બાદ નવ કામદારો ખાણની અંદર ફસાયા હતા. જેમાંથી અત્યાર સુધીમાં ચાર મજૂરોના મૃતદેહ મળી આવ્યા છે. પ્રથમ મૃતદેહ બુધવારે મળી આવ્યો હતો, જ્યારે શનિવારે અન્ય ત્રણ મૃતદેહ મળી આવ્યા હતા. NDRF ટીમના કમાન્ડર રોશન કુમાર સિંહે જણાવ્યું હતું કે ડૂબી ગયેલી ખાણમાંથી પાણી કાઢવાની પ્રક્રિયા ચાલી રહી છે અને પાણીનું સ્તર ઘટી રહ્યું છે. તેમણે કહ્યું, "આજે બચાવ કામગીરીનો સાતમો દિવસ છે અને અત્યાર સુધીમાં ચાર મૃતદેહો બહાર કાઢવામાં આવ્યા છે. ડ્રેનેજનું કામ ચાલી રહ્યું છે અને પાણીનું સ્તર ઘટી રહ્યું છે." NDRF, SDRF, આર્મી અને નેવીના જવાનો સહિત અનેક એજન્સીઓ આ ઓપરેશનમાં સામેલ છે અને ડ્રોન તૈનાત કરવામાં આવ્યા છે.
આસામની કોલસાની ખાણમાંથી 4 મૃતદેહ બહાર કાઢવામાં આવ્યા, રેસ્ક્યુ ઓપરેશન હજુ ચાલુ
