ભાજપની કેન્દ્રીય ચૂંટણી સમિતિએ પશ્ચિમ બંગાળમાં 2026 માં યોજાનારી રાજ્યસભા પેટાચૂંટણી માટે ત્રણ ઉમેદવારોની યાદી જાહેર કરી છે. ભાજપે પશ્ચિમ બંગાળમાંથી તૃણમૂલ કોંગ્રેસના બળવાખોર નેતાઓ સુષ્મિતા દેવ, સુખેન્દુ શેખર રોય અને પ્રકાશ ચિક બરૈકને પોતાના ઉમેદવારો તરીકે જાહેર કર્યા છે.
ગયા મહિને ટીએમસીમાંથી રાજીનામું આપ્યા બાદ આ ત્રણેય નેતાઓ આજે ભાજપમાં જોડાયા હતા. સુખેન્દુએ 8 જૂને, સુષ્મિતાએ 10 જૂને અને પ્રકાશે 11 જૂને રાજીનામું આપ્યું હતું. ત્રણેય નેતાઓએ મમતા બેનર્જી પ્રત્યે નારાજગી વ્યક્ત કરી હતી અને આરોપ લગાવ્યો હતો કે પાર્ટી મનસ્વી રીતે ચલાવવામાં આવી રહી છે.
મમતા બેનર્જીના પક્ષમાં વધી રહેલા બળવા વચ્ચે તૃણમૂલ કોંગ્રેસમાંથી રાજીનામું આપ્યા બાદ , આજે પશ્ચિમ બંગાળ ભાજપ પ્રમુખ સમિક ભટ્ટાચાર્ય અને અન્ય વરિષ્ઠ નેતાઓની હાજરીમાં પક્ષના સોલ્ટ લેક કાર્યાલયમાં ત્રણેય નેતાઓને ભાજપમાં સામેલ કરવામાં આવ્યા. ભટ્ટાચાર્યએ ત્રણેય નેતાઓનું ભાજપના ધ્વજ સાથે સ્વાગત કર્યું અને કહ્યું કે તેમનો રાજકીય અનુભવ રાજ્યમાં ભાજપને મજબૂત બનાવશે. પશ્ચિમ બંગાળની આ ત્રણ રાજ્યસભા બેઠકો પર પેટાચૂંટણી માટે મતદાન અને મતગણતરી 24 જુલાઈએ થશે. પેટાચૂંટણીનું જાહેરનામું 7 જુલાઈએ જારી કરવામાં આવશે. 14 જુલાઈ સુધી નામાંકન સ્વીકારવામાં આવશે અને નામાંકન પત્રોની ચકાસણી 15 જુલાઈએ થશે.
પશ્ચિમ બંગાળ વિધાનસભાની વર્તમાન સંખ્યાબળ મુજબ, ભાજપના ઉમેદવારો ત્રણેય બેઠકો જીતે તેવી શક્યતા છે. ભાજપ પાસે હાલમાં વિધાનસભામાં 208 ધારાસભ્યો છે. ભાજપના ઉમેદવારને હરાવવા માટે વિપક્ષના ઉમેદવારને ઓછામાં ઓછા 70 મતોની જરૂર પડશે. આ ચૂંટણીમાં તૃણમૂલ કોંગ્રેસે 80 બેઠકો જીતી હતી, અને આમાંથી 60 ધારાસભ્યોએ ઋતબ્રત બેનર્જીના નેતૃત્વમાં એક અલગ જૂથ બનાવ્યું છે. મમતા બેનર્જી પાસે ફક્ત 20 ધારાસભ્યો બાકી છે.
