દિલ્હીમાં ઇમારત ધરાશાયી થવાથી ત્રણ લોકોના મોત

દક્ષિણ દિલ્હીના સત્ય નિકેતનમાં પાંચ માળની ઇમારત ધરાશાયી થતાં અનેક લોકો કાટમાળ નીચે ફસાયા હતા. ત્રણ લોકોના મોત થયાના અહેવાલ છે, જ્યારે ત્રણની હાલત ગંભીર હોવાનું કહેવાય છે. અત્યાર સુધીમાં નવ લોકોને બચાવી લેવામાં આવ્યા છે. ઘાયલોમાંથી ત્રણને AIIMS ટ્રોમા સેન્ટરમાં રિફર કરવામાં આવ્યા છે. ઘટનાસ્થળે બચાવ કામગીરી ચાલી રહી છે. એવું કહેવામાં આવી રહ્યું છે કે જે ઇમારત ધરાશાયી થઈ તેમાં વિદ્યાર્થીઓ માટે એક PG પણ ચાલતું હતું. રવિવારની રજા હોવાથી, મોટાભાગના વિદ્યાર્થીઓ PGમાં હતા. 

પ્રધાનમંત્રી નરેન્દ્ર મોદી અને ગૃહમંત્રી અમિત શાહે પણ આ ઘટના પર ઊંડો શોક વ્યક્ત કર્યો હતો. પીએમ મોદીએ કહ્યું, દિલ્હીના સત્ય નિકેતનમાં એક ઇમારત ધરાશાયી થવાની ઘટના દુ:ખદ છે. જેમણે પોતાના પ્રિયજનો ગુમાવ્યા છે તેમના પ્રત્યે મારી સંવેદના છે. હું ઘાયલોના ઝડપથી સ્વસ્થ થવા માટે પ્રાર્થના કરું છું. અધિકારીઓ ઘટનાસ્થળે કામ કરી રહ્યા છે અને અકસ્માતથી પ્રભાવિત લોકોને સહાય પૂરી પાડી રહ્યા છે.

અમિત શાહે કહ્યું, દિલ્હીના સત્ય નિકેતનમાં એક ઇમારત ધરાશાયી થવાથી મને ખૂબ જ દુઃખ થયું છે. મેં મુખ્યમંત્રી, દિલ્હી પોલીસ કમિશનર અને NDRFના ડાયરેક્ટર જનરલ સાથે વાત કરી અને જમીની પરિસ્થિતિની સમીક્ષા કરી. સ્થાનિક વહીવટીતંત્ર અને NDRF સંયુક્ત રીતે એક વિશાળ બચાવ કામગીરી ચલાવી રહ્યા છે. ઘાયલોને તમામ જરૂરી તબીબી સહાય પૂરી પાડવામાં આવી રહી છે. હું તમામ ઘાયલોના ઝડપી સ્વસ્થ થવા માટે પ્રાર્થના કરું છું.