વડોદરામાં ગણેશ મૂર્તિ પર ઇંડા ફેંકવાના આરોપીઓનું પોલીસે સરઘસ કાઢ્યું

વડોદરા શહેર પોલીસે વડોદરામાં ગણેશ મૂર્તિ પર ઇંડા ફેંકનારા યુવાનોનું સરઘસ કાઢ્યું છે. આરોપીઓએ આ ઘટના માટે માફી પણ માંગી છે. વડોદરાના પાણીગેટ વિસ્તારમાં ગણેશ મૂર્તિ પર ઇંડા ફેંકવાની ઘટના બાદ પોલીસે બંને આરોપીઓનું જાહેર સરઘસ કાઢ્યું હતું અને તેમની પાસેથી માફી માંગી હતી. માંજલપુર ગણેશ મંડળના શ્રીજીની મૂર્તિ સ્થાપન દરમ્યાન આ ઘટના બની હતી. મોડી રાત્રે લગભગ 2:30 વાગ્યે પાણીગેટ નજીક મદાર માર્કેટ પાસે કેટલાક અજાણ્યા લોકોએ મૂર્તિ પર ઇંડા ફેંક્યા હતા. આ ઘટનાથી ગણેશ મંડળોમાં ભારે રોષ ફેલાયો હતો. ઘટના બાદ, પોલીસે કોઈપણ અનિચ્છનીય ઘટના ન બને તે માટે તાત્કાલિક કાર્યવાહી કરી. થોડા કલાકોમાં જ પોલીસે એક સગીર સહિત ત્રણ આરોપીઓની ધરપકડ કરી અને નવી પ્રતિમાની પણ વ્યવસ્થા કરી. આરોપીઓની ઓળખ સુફિયાન મન્સૂરી અને શાહ નવાઝ ઉર્ફે બદબાદ કુરેશી તરીકે થઈ છે. પોલીસે આજે આ બંને આરોપીઓને તેમના જ વિસ્તાર, વાડીના ખાનગાહ મોહલ્લામાં જાહેરમાં પરેડ કરાવી હતી. તેમના હાથ દોરડાથી બાંધેલા હતા. આ સરઘસ દરમિયાન, બંને આરોપીઓએ હાથ જોડીને પોતાના કૃત્ય બદલ માફી માંગી હતી. આ ઘટના બાદ ગણેશ મંડળો અને સ્થાનિક ભાજપ કાર્યકરોમાં ભારે રોષ જોવા મળ્યો હતો. પરંતુ પોલીસે તાત્કાલિક આરોપીઓને શોધી કાઢ્યા અને કડક કાર્યવાહીની ખાતરી આપી, જેના કારણે મામલો થાળે પડ્યો અને કોઈ અનિચ્છનીય ઘટના બની નહીં.