પાકિસ્તાનના પૂર્વ પીએમ ઈમરાન ખાને હાઈકોર્ટનો સંપર્ક કર્યો

જેલમાં બંધ પાકિસ્તાનના ભૂતપૂર્વ વડા પ્રધાન ઇમરાન ખાને 9 મે, 2023ના રોજ થયેલી હિંસા સંબંધિત આઠ કેસમાં ધરપકડ બાદ જામીન મેળવવા માટે લાહોર હાઇકોર્ટમાં અરજી કરી છે. આ કેસોમાં સેનાના એક વરિષ્ઠ અધિકારીના નિવાસસ્થાન પર હુમલો પણ સામેલ છે. શનિવારે લાહોર હાઈકોર્ટ સમક્ષ અલગ-અલગ જામીન અરજી દાખલ કરવામાં આવી હતી. ગયા વર્ષે નવેમ્બરમાં લાહોરની આતંકવાદ વિરોધી અદાલતે આ કેસોમાં ખાનને જામીન આપવાનો ઇનકાર કરી દીધો હતો. ઈમરાન ખાને (72) તેમની અરજીઓમાં દલીલ કરી હતી કે તેમની ધરપકડ બાદ 9 મેના રોજ ફાટી નીકળેલી હિંસામાં તેમની સંડોવણી સાબિત કરવામાં ફરિયાદી પક્ષ નિષ્ફળ રહ્યો હતો. ઈસ્લામાબાદ હાઈકોર્ટ સંકુલમાંથી 9 મે 2023ના રોજ અર્ધલશ્કરી રેન્જર્સ દ્વારા ખાનની ધરપકડ બાદ હિંસક વિરોધ ફાટી નીકળ્યો હતો. તેમના પક્ષના કાર્યકરોએ જિન્નાહ હાઉસ (લાહોર કોર્પ્સ કમાન્ડર હાઉસ), મિયાંવાલી એર બેઝ અને ફૈસલાબાદમાં આઈએસઆઈ બિલ્ડિંગ સહિત એક ડઝન લશ્કરી સ્થાપનોમાં તોડફોડ કરી હતી. ટોળાએ રાવલપિંડીમાં આર્મી હેડક્વાર્ટર (GHQ) પર પણ હુમલો કર્યો હતો. ખાને કહ્યું હતું કે "માત્ર રાજકીય કારણોસર તેમને હેરાન કરવા અને અપમાનિત કરવાના સુનિયોજિત કાવતરા"ના પરિણામે 9 મેના કેસમાં તેમને ફસાવવામાં આવ્યા હતા. તેમણે કહ્યું કે આ કેસોમાં તેમની સામે એકમાત્ર આરોપ 'ઉશ્કેરણી'નો છે, જેને ફરિયાદ પક્ષે ખૂબ જ અસ્પષ્ટ રીતે આગળ વધાર્યો છે. લાહોર હાઈકોર્ટ સોમવારે ખાનની અરજી પર વિચારણા કરે તેવી શક્યતા છે. ખાન કેટલાક કેસોના સંબંધમાં ઓગસ્ટ 2023 થી જેલમાં છે.