મહારાષ્ટ્રના નાયબ મુખ્યમંત્રી અને રાષ્ટ્રવાદી કોંગ્રેસ પાર્ટી (NCP) ના નેતા સુનેત્રા પવારે સોમવારે 23 એપ્રિલે યોજાનારી બારામતી વિધાનસભા પેટાચૂંટણી માટે પોતાનું ઉમેદવારી પત્ર ભર્યું. તેમણે તેમના પક્ષના સાથીદારો સુનીલ તટકરે, પ્રફુલ્લ પટેલ, છગન ભુજબળ, ધનંજય મુંડે અને હસન મુશ્રીફ, તેમજ શિવસેનાના વડા અને નાયબ મુખ્યમંત્રી એકનાથ શિંદે અને રાજ્ય મંત્રી અને ભાજપ નેતા ચંદ્રશેખર બાવનકુલેની હાજરીમાં પોતાનું ઉમેદવારી પત્ર ભર્યું. એનસીપી, ભાજપ અને શિવસેના શાસક મહાયુતિ ગઠબંધનનો ભાગ છે. ઉમેદવારી નોંધાવતા પહેલા, સુનેત્રા પવારે બારામતીના લોકોને ભાવનાત્મક અપીલ કરી હતી, અને તેમને હંમેશા તેમના સ્વર્ગસ્થ પતિ અજિત પવારની જેમ ટેકો આપવા કહ્યું હતું. ઉલ્લેખનીય છે કે બારામતીમાં આ પેટાચૂંટણી 28 જાન્યુઆરીએ વિમાન દુર્ઘટનામાં તત્કાલીન નાયબ મુખ્યમંત્રી અને વરિષ્ઠ એનસીપી નેતા અજિત પવારના અવસાન બાદ યોજાઈ રહી છે. સુનેત્રા પવારે કહ્યું કે તેઓ તેમના વિકાસના વારસાને આગળ વધારવા માટે પ્રતિબદ્ધ છે. તેમણે અજિત પવારના અવસાનને ફક્ત તેમના પરિવાર માટે જ નહીં પરંતુ સમગ્ર રાજ્ય માટે "મોટી ખોટ" ગણાવી, કહ્યું, અમે ક્યારેય કલ્પના પણ નહોતી કરી કે આવી પેટાચૂંટણી થશે. બારામતીના દરેક ભાગમાં અજિત દાદાની છાપ છે. મારા દુઃખ છતાં, મેં લોકો વચ્ચે બહાર આવવાનું નક્કી કર્યું છે.
સોનેત્રા પવારે કહ્યું કે, તમે હંમેશા તમારા અજિત દાદાને રેકોર્ડ મતોથી જીતાડ્યા છે. આ પહેલી ચૂંટણી છે જેમાં તેઓ આપણી વચ્ચે નથી. મને વિશ્વાસ છે કે તમે મને આટલો જ પ્રેમ અને ટેકો આપશો." સુનેત્રા પવારે ખાતરી આપી હતી કે બારામતીનો વિકાસ કોઈપણ વિક્ષેપ વિના ચાલુ રહેશે અને વહીવટી શિસ્ત જાળવવામાં આવશે.
