By કતારના દોહામાં 14 નવેમ્બરથી શરૂ થનારી ACC મેન્સ એશિયા કપ રાઇઝિંગ સ્ટાર્સ 2025, T20 ફોર્મેટમાં રમાશે. આ ટુર્નામેન્ટમાં કુલ આઠ ટીમો ભાગ લેશે. ભારત અને પાકિસ્તાનની A ટીમો પણ આ ટુર્નામેન્ટનો ભાગ છે. ભારતીય ટીમની જાહેરાત થઈ ચૂકી છે. હવે, પાકિસ્તાનની ટીમની પણ જાહેરાત થઈ ગઈ છે.
મુહમ્મદ ઇરફાન ખાનને પાકિસ્તાન A ટીમ, પાકિસ્તાન શાહીન્સના કેપ્ટન તરીકે નિયુક્ત કરવામાં આવ્યા છે. રાઇઝિંગ સ્ટાર્સ એશિયા કપ 14 થી 23 નવેમ્બર દરમિયાન કતારમાં રમાશે. પાકિસ્તાન શાહીન્સને ગ્રુપ B માં રાખવામાં આવ્યા છે, જેમાં ઓમાન, ભારત A અને UAEનો સામનો કરવો પડશે. ગ્રુપ A માં અફઘાનિસ્તાન A, બાંગ્લાદેશ A, હોંગકોંગ અને શ્રીલંકા Aનો સમાવેશ થાય છે.
પાકિસ્તાન શાહીન ટીમ 14 નવેમ્બરે ઓમાન સામે પોતાની પહેલી મેચ રમશે, ત્યારબાદ 16 નવેમ્બરે ભારત ‘A’ ટીમ સાથે ટકરાશે. ટીમનો અંતિમ ગ્રુપ મેચ 18 નવેમ્બરે UAE સામે થશે. ટીમ પસંદગીકારોએ આ વખતે યુવા અને ઉભરતા ખેલાડીઓને તક આપી છે. આખી ટીમમાં ફક્ત ત્રણ ખેલાડીઓ પાસે અગાઉ સિનિયર રાષ્ટ્રીય ટીમનો અનુભવ છે: કેપ્ટન મુહમ્મદ ઇરફાન, સ્પિનર સુફિયાન મુકીમ અને ફાસ્ટ બોલર અહેમદ દાનિયાલ. બાકીના યુવાન, પ્રતિભાશાળી ખેલાડીઓ છે જેમણે અંડર-19, શાહીનના કાર્યક્રમો, સ્થાનિક ક્રિકેટ અને પાકિસ્તાન સુપર લીગમાં સારું પ્રદર્શન કર્યું છે.
ટુર્નામેન્ટ ફોર્મેટ મુજબ, દરેક ગ્રુપમાંથી ટોચની બે ટીમો સેમિફાઇનલમાં પહોંચશે, જે 21 નવેમ્બરે રમાશે. ફાઇનલ 23 નવેમ્બરે યોજાશે. બધી મેચ દોહાના વેસ્ટ એન્ડ પાર્ક ઇન્ટરનેશનલ ક્રિકેટ સ્ટેડિયમ ખાતે રમાશે. પાકિસ્તાન શાહીન 12 નવેમ્બરે રવાના થતા પહેલા 8 થી 11 નવેમ્બર દરમિયાન કરાચીના હનીફ મુહમ્મદ હાઇ પર્ફોર્મન્સ સેન્ટર ખાતે તાલીમ શિબિરનું આયોજન કરશે.
પાકિસ્તાન શાહિન્સ સ્ક્વોડ: મુહમ્મદ ઈરફાન ખાન (કેપ્ટન), અહેમદ દાનિયાલ, અરાફાત મિન્હાસ, માઝ સદાકત, મોહમ્મદ ફૈક, મોહમ્મદ ગાઝી ગૌરી, મોહમ્મદ નઈમ, મોહમ્મદ સલમાન, મોહમ્મદ શહઝાદ, મુબાસિર ખાન, સાદ મસૂદ, શાહિદ અઝીઝ, સુફયાન મુકીમ, ઉબેદ શાહ અને યાસિર ખાન.
