રશિયા પાસેથી સૌથી વધુ ક્રૂડ ઓઇલ ખરીદતા દેશોની યાદીમાં ભારત ત્રીજા ક્રમે

ડિસેમ્બર 2025 માં રશિયા પાસેથી ક્રૂડ ઓઇલ ખરીદવાના સંદર્ભમાં ભારત હવે ત્રીજા સ્થાને સરકી ગયું છે. રિલાયન્સ ઇન્ડસ્ટ્રીઝ અને જાહેર ક્ષેત્રની રિફાઇનરીઓ દ્વારા ક્રૂડ ઓઇલની આયાતમાં ભારે કાપ મૂકવાને કારણે આવું થયું છે. યુરોપિયન રિસર્ચ ઇન્સ્ટિટ્યૂટ સેન્ટર ફોર રિસર્ચ ઓન એનર્જી એન્ડ ક્લીન એર (CREA) એ મંગળવારે આ માહિતી આપી. CREA અનુસાર, ડિસેમ્બરમાં રશિયામાંથી ભારતની કુલ હાઇડ્રોકાર્બન આયાત 2.3 બિલિયન યુરો રહી હતી, જે પાછલા મહિના એટલે કે નવેમ્બરમાં 3.3 બિલિયન યુરો કરતા 1 બિલિયન યુરો ઓછી છે.

તુર્કી હવે ભારતને પાછળ છોડીને રશિયન ક્રૂડ ઓઇલનો બીજો સૌથી મોટો આયાતકાર બની ગયો છે, ડિસેમ્બરમાં રશિયા પાસેથી 2.6 બિલિયન યુરોના હાઇડ્રોકાર્બન ખરીદ્યા છે,” CREA રિપોર્ટમાં જણાવાયું છે. જોકે, ચીન રશિયન ક્રૂડ ઓઇલનો સૌથી મોટો ખરીદદાર રહ્યો છે, જે ટોચના પાંચ આયાતકારો પાસેથી રશિયાની નિકાસ કમાણીના 48 ટકા (છ બિલિયન યુરો) હિસ્સો ધરાવે છે.

ભારત રશિયન અશ્મિભૂત ઇંધણનો ત્રીજો સૌથી મોટો ખરીદદાર હતો, જેણે ડિસેમ્બરમાં 2.3 બિલિયન યુરોના રશિયન હાઇડ્રોકાર્બન આયાત કર્યા હતા. ભારતની કુલ ખરીદીમાં ક્રૂડ ઓઇલનો હિસ્સો 78 ટકા હતો, જે કુલ 1.8 બિલિયન યુરો હતો. ઉપરાંત કોલસો (424 મિલિયન યુરો) અને તેલ ઉત્પાદનો (82 મિલિયન યુરો) આયાત કરવામાં આવ્યા હતા,” CREA એ જણાવ્યું હતું.

નવેમ્બરમાં ભારતે રશિયન ક્રૂડ ઓઇલ ખરીદી પર 2.6 અબજ યુરો ખર્ચ્યા. CREA એ જણાવ્યું હતું કે ભારતની રશિયન ક્રૂડ ઓઇલ આયાતમાં માસિક ધોરણે 29 ટકાનો તીવ્ર ઘટાડો થયો છે. રિપોર્ટ અનુસાર, આ ઘટાડાનું મુખ્ય કારણ રિલાયન્સ ઇન્ડસ્ટ્રીઝની જામનગર રિફાઇનરી હતી, જેણે ડિસેમ્બરમાં રશિયાથી તેની આયાત અડધી કરી દીધી હતી. જાહેર ક્ષેત્રની તેલ રિફાઇનરીઓએ પણ ડિસેમ્બરમાં રશિયન આયાત 15 ટકા ઘટાડી હતી.