ઇન્ટરનેટ પર ‘સમુદ્ર સંકટ’, લાલ સમુદ્રમાં કેબલ કપાયો, ભારત-પાકિસ્તાન સહિત એશિયા-મધ્ય પૂર્વમાં કનેક્ટિવિટી ખોરવાઈ

લાલ સમુદ્રની નીચે બિછાવેલા ફાઇબર ઓપ્ટિક કેબલ કાપવાને કારણે એશિયા અને મધ્ય પૂર્વના ઘણા દેશોમાં ઇન્ટરનેટ સેવાઓ ગંભીર રીતે પ્રભાવિત થઈ છે. આ માહિતી ગયા રવિવારે ઇન્ટરનેટ મોનિટરિંગ સંસ્થા નેટબ્લોક્સ અને વિવિધ ટેકનિકલ નિષ્ણાતો દ્વારા આપવામાં આવી હતી. જોકે, હજુ સુધી સ્પષ્ટ નથી કે આ ઘટના કોઈ ટેકનિકલ ખામીને કારણે બની છે કે પછી ઇરાદાપૂર્વક કરવામાં આવેલી તોડફોડ છે. પ્રદેશમાં ચાલી રહેલા લશ્કરી સંઘર્ષોને ધ્યાનમાં રાખીને, કાવતરું હોવાની શક્યતા પણ વ્યક્ત કરવામાં આવી રહી છે, પરંતુ તેની પુષ્ટિ થઈ નથી.

એપી અનુસાર, આ ઘટનાથી ઘણા મોટા કેબલ નેટવર્ક પ્રભાવિત થયા છે. આમાં ભારતના ટાટા કોમ્યુનિકેશન્સ દ્વારા સંચાલિત SMW4 (દક્ષિણ પૂર્વ એશિયા-મધ્ય પૂર્વ-પશ્ચિમ યુરોપ 4) અને IMEWE (ભારત-મધ્ય પૂર્વ-પશ્ચિમ યુરોપ) જેવા મહત્વપૂર્ણ કેબલનો સમાવેશ થાય છે. વિશ્વના 95% થી વધુ ઇન્ટરનેટ ટ્રાફિક આ કેબલ દ્વારા થાય છે. નેટબ્લોક્સે તેના અહેવાલમાં જણાવ્યું છે કે આ કેબલ કાપવાથી ભારત, પાકિસ્તાન અને આસપાસના ઘણા દેશોમાં ઇન્ટરનેટની ગતિ ધીમી પડી ગઈ છે. માઇક્રોસોફ્ટે પણ તેના સર્વિસ સ્ટેટસ પેજ પર આ વાતની પુષ્ટિ કરી છે અને કહ્યું છે કે મધ્ય પૂર્વ ક્ષેત્રમાં દરિયાઈ ફાઇબર કાપને કારણે ઇન્ટરનેટની લેટન્સી (ગતિમાં વિલંબ) વધી શકે છે, પરંતુ આ પ્રદેશની બહાર તેની અસર અનુભવાઈ નથી.

પાકિસ્તાન: પાકિસ્તાન ટેલિકોમ્યુનિકેશન્સ લિમિટેડ (PTCL) એ પુષ્ટિ આપી છે કે સમુદ્રની અંદરના કેબલ્સમાં ખામીને કારણે તેમના દેશમાં ઇન્ટરનેટ સેવાઓ ખોરવાઈ ગઈ છે.

સંયુક્ત આરબ અમીરાત (UAE): સરકારી ટેલિકોમ કંપનીઓ ડુ અને એતિસલાટના ગ્રાહકોએ ઇન્ટરનેટ સ્પીડમાં ઘટાડો નોંધાવ્યો છે.

કુવૈત: સ્થાનિક અધિકારીઓએ જણાવ્યું હતું કે FALCON GCX કેબલને નુકસાન થવાને કારણે ત્યાં નેટવર્ક પણ ખોરવાઈ ગયું હતું.

એપી ન્યૂઝ અનુસાર, સમુદ્ર નીચે નાખેલા આ કેબલ અત્યંત સંવેદનશીલ હોય છે અને ઘણીવાર જહાજોના લંગર અથવા કુદરતી આફતોને કારણે નુકસાન થાય છે. આ કેબલ્સના સમારકામમાં ઘણા અઠવાડિયા લાગી શકે છે અને ખાસ જહાજો અને નિષ્ણાતોની મદદની જરૂર પડે છે.

યમનમાં સક્રિય ઈરાન સમર્થિત હુથી બળવાખોરો છેલ્લા એક વર્ષથી લાલ સમુદ્રમાં જહાજો પર હુમલો કરી રહ્યા છે. આ હુમલાઓમાં અત્યાર સુધીમાં 4 જહાજો ડૂબી ગયા છે અને ઘણા ખલાસીઓએ જીવ ગુમાવ્યા છે. જોકે, હુથી બળવાખોરોએ દરિયાઈ કેબલને નુકસાન પહોંચાડવાના આરોપોને નકારી કાઢ્યા છે. તેમની સેટેલાઇટ ચેનલ અલ-મસિરાહે નેટબ્લોક્સનો અહેવાલ શેર કર્યો હતો, પરંતુ ઘટનાની જવાબદારી લીધી ન હતી.

બીજી તરફ, યમનની આંતરરાષ્ટ્રીય સ્તરે માન્યતા પ્રાપ્ત સરકારે આ ઘટના માટે હુતી બળવાખોરોને જવાબદાર ઠેરવ્યા છે. યમનના માહિતી પ્રધાન, મુઅમ્મર અલ-એરિયાનીએ તેને સમગ્ર વિશ્વ માટે ચેતવણી ગણાવી હતી અને કહ્યું હતું કે આંતરરાષ્ટ્રીય સમુદાયે ડિજિટલ ઈન્ફ્રાસ્ટ્રક્ચરના રક્ષણ માટે કડક પગલાં લેવા જોઈએ. આ ઘટના વૈશ્વિક સ્તરે ડિજિટલ સુરક્ષા, ઈન્ટરનેટ ઈન્ફ્રાસ્ટ્રક્ચર અને સાયબર યુદ્ધ અંગે ગંભીર ચિંતાઓ ઉભી કરી રહી છે.