T20 વર્લ્ડ કપમાં રમવા અંગે સ્કોટલેન્ડ બોર્ડનું મોટું નિવેદન, ICC ચેરમેન જય શાહનો આભાર માન્યો

બાંગ્લાદેશ T20 વર્લ્ડ કપમાંથી બહાર થઈ ગયું છે. ICC એ ટુર્નામેન્ટ માટે તેમના સ્થાને ક્રિકેટ સ્કોટલેન્ડનો સમાવેશ કર્યો છે. ICC ના ચેરમેન જય શાહે દુબઈમાં એક બેઠક દરમિયાન આ નિર્ણય લીધો. ICC એ તેના સોશિયલ મીડિયા હેન્ડલ્સ પર આ જાહેરાત કરી. ગુરુવારે ICC દ્વારા આપવામાં આવેલી 24 કલાકની સમયમર્યાદા છતાં, બાંગ્લાદેશ સરકારે ભારતમાં રમવાનો ઇનકાર કર્યો, જેના કારણે ICC ને આ પગલું ભરવાની ફરજ પડી હતી.

T20 વર્લ્ડ કપમાં એન્ટ્રી મળ્યા બાદ, હવે ક્રિકેટ સ્કોટલેન્ડ તરફથી એક મોટું નિવેદન આવ્યું છે. ક્રિકેટ સ્કોટલેન્ડે કહ્યું કે ICC એ તેમની પુરુષ ટીમને આગામી T20 વર્લ્ડ કપમાં ભાગ લેવા માટે આમંત્રણ આપ્યું છે. બોર્ડે એ પણ માહિતી આપી કે તેમણે આ આમંત્રણ સ્વીકારી લીધું છે. ક્રિકેટ સ્કોટલેન્ડના CEO ટ્રુડી લિન્ડબ્લેડે કહ્યું કે આજે સવારે (24 જાન્યુઆરી) મને ICC તરફથી એક પત્ર મળ્યો જેમાં પૂછવામાં આવ્યું હતું કે શું અમારી પુરુષ ટીમ પુરુષોના T20 વર્લ્ડ કપમાં રમશે, અને અમે તેનો સ્વીકાર કર્યો છે.

ક્રિકેટ સ્કોટલેન્ડના ચેરમેન વિલ્ફ વોલ્શે જણાવ્યું હતું કે, “આજે સવારે મને ICCના ચેરમેન જય શાહનો ફોન આવ્યો જેમાં પુષ્ટિ મળી હતી કે સ્કોટલેન્ડને ICC મેન્સ T20 વર્લ્ડ કપમાં રમવા માટે આમંત્રણ મળશે. મને મારી ટીમ વતી તેનો સ્વીકાર કરતાં આનંદ થાય છે, જે જવા માટે તૈયાર છે. અમે આ તક માટે ICCનો આભાર માનીએ છીએ.” તેમણે વધુમાં ઉમેર્યું હતું કે, “આ આમંત્રણ માટે અમે ICCના આભારી છીએ.

સ્કોટલેન્ડના ખેલાડીઓ માટે લાખો સમર્થકોની સામે વૈશ્વિક મંચ પર રમવા અને સ્પર્ધા કરવાની આ એક સુવર્ણ તક છે. અમે એ પણ સ્વીકારીએ છીએ કે આ તક મુશ્કેલ અને અનોખા સંજોગોને કારણે ઊભી થઈ છે. અમારા ખેલાડીઓ આ ટુર્નામેન્ટમાં પોતાનું શ્રેષ્ઠ પ્રદર્શન કરવાનો પ્રયાસ કરશે. સ્કોટલેન્ડના ખેલાડીઓ આગામી પ્રવાસ માટે ઘણા અઠવાડિયાથી તાલીમ લઈ રહ્યા છે અને હવે તેઓ ટૂંક સમયમાં ભારત આવવાની તૈયારી કરી રહ્યા છે જેથી તેઓ વાતાવરણને અનુકૂલન કરી શકે, રમત માટે તૈયારી કરી શકે અને એક શાનદાર ICC મેન્સ T20 વર્લ્ડ કપમાં યોગદાન આપી શકે.