By હિન્દી ફિલ્મ ‘હોમબાઉન્ડ’ને 2026ના ઓસ્કાર માટે ભારતની સત્તાવાર એન્ટ્રી તરીકે પસંદ કરવામાં આવી છે. આ ફિલ્મ બેસ્ટ ઇન્ટરનેશનલ ફીચર કેટેગરીમાં સ્પર્ધા કરશે. આ જાહેરાત એન ચંદ્રાએ શુક્રવાર, 19 સપ્ટેમ્બરના રોજ કોલકાતામાં કરી હતી. આ ફિલ્મ હજુ સુધી ભારતમાં રિલીઝ થઈ નથી. ઇશાન ખટ્ટર, વિશાલ જેઠવા અને જાહ્નવી કપૂર અભિનીત ‘હોમબાઉન્ડ’ 26 સપ્ટેમ્બરના રોજ સિનેમાઘરોમાં રિલીઝ થવાની છે. ફિલ્મને તેના કાન પ્રીમિયરમાં 9 મિનિટનો સ્ટેન્ડિંગ ઓવેશન પણ મળ્યો. એટલું જ નહીં, આ ફિલ્મે 2025 ટોરોન્ટો ઇન્ટરનેશનલ ફિલ્મ ફેસ્ટિવલ (TIFF)માં ઇન્ટરનેશનલ પીપલ્સ ચોઇસ એવોર્ડ માટે બીજા ક્રમે પણ સ્થાન મેળવ્યું.
ઈશાન ખટ્ટર, વિશાલ જેઠવા અને જાહ્નવી કપૂરની ફિલ્મ “હોમબાઉન્ડ” ને હવે ઓસ્કાર 2026 માટે સત્તાવાર એન્ટ્રી મળી ગઈ છે. કોલકાતામાં એક પ્રેસ કોન્ફરન્સમાં બોલતા તેમણે કહ્યું કે ઓસ્કારમાં દેશનું પ્રતિનિધિત્વ કરવા માટે વિવિધ ભાષાઓમાં કુલ 24 ફિલ્મોનો સમાવેશ કરવામાં આવ્યો હતો. પીટીઆઈ અનુસાર, તેમણે કહ્યું, “મારા માટે આ ખૂબ જ મુશ્કેલ પસંદગી હતી. એવી ઘણી ફિલ્મો હતી જે લોકોના જીવનને સ્પર્શી ગઈ.” તેમણે વધુમાં કહ્યું, “અમે જજ નહીં, પણ કોચ હતા. અમે એવા ખેલાડીઓ શોધી રહ્યા હતા જેમણે પોતાનું નામ બનાવ્યું હોય.
આ ફિલ્મ ઉત્તર ભારતના એક નાના ગામડાના બે બાળપણના મિત્રોની વાર્તા કહે છે જેઓ પોલીસ અધિકારી બનવાનું સ્વપ્ન જુએ છે, અને માને છે કે આ નોકરી તેમને એ સન્માન આપશે જે તેમને પહેલાં ક્યારેય મળ્યું નથી. જોકે, જેમ જેમ તેઓ તેમના ધ્યેયની નજીક પહોંચે છે, તેમ તેમ તેઓ જે દબાણ અને મુશ્કેલીઓનો સામનો કરે છે તે તેમની મિત્રતામાં તણાવ પેદા કરવા લાગે છે. આ ફિલ્મ મિત્રતાના વિષય પર આધારિત છે.
ટોરોન્ટો ફિલ્મ ફેસ્ટિવલના ૫૦મા સંસ્કરણમાં આ ફિલ્મને દર્શકો તરફથી જબરદસ્ત પ્રતિસાદ મળ્યો. તેને TIFF પીપલ્સ ચોઇસ ઇન્ટરનેશનલ એવોર્ડ માટે શોર્ટલિસ્ટ કરવામાં આવી હતી, જેમાં તે બીજા ક્રમે રહી હતી. આ ફિલ્મ બશરત પીરના ૨૦૨૦ના ન્યૂ યોર્ક ટાઇમ્સના લેખ “અ ફ્રેન્ડશીપ, અ પેન્ડેમિક, એન્ડ અ ડેથ બિસાઇડ ધ હાઇવે” પરથી પ્રેરિત છે. આ ફિલ્મનું નિર્માણ કરણ જોહર દ્વારા ધર્મા પ્રોડક્શન્સના બેનર હેઠળ કરવામાં આવ્યું છે.
