મેચ પછી ભારતીય કેપ્ટને આપ્યું મોટું નિવેદન, પાકિસ્તાન સામેની જીત અંગે કહી આ વાત

ભારતીય મહિલા ટીમે ICC ODI વર્લ્ડ કપ 2025 માં તેનો બીજો મુકાબલો 5 ઓક્ટોબરના રોજ કોલંબોના આર પ્રેમદાસા સ્ટેડિયમ ખાતે પાકિસ્તાન મહિલા ટીમ સામે રમ્યો હતો, જેમાં ટીમ ઈન્ડિયાએ 88 રનથી મેચ જીતી હતી અને ટૂર્નામેન્ટમાં સતત બીજી જીત પણ મેળવી હતી. આ મેચમાં ટીમ ઈન્ડિયાના બેટ્સમેનોનું પ્રદર્શન અપેક્ષા મુજબ નહોતું જેમાં આખી ટીમ 247 રન બનાવીને સિમિત રહી હતી, પરંતુ બોલિંગમાં દીપ્તિ શર્મા અને ક્રાંતિ ગૌરે પોતાની શાનદાર બોલિંગ બતાવી અને પાકિસ્તાની મહિલા ટીમને 159 રનમાં ઓલઆઉટ કરી દીધી. આ જીત પછી, ભારતીય કેપ્ટન હરમનપ્રીત કૌરનું એક નિવેદન પણ બહાર આવ્યું જેમાં તેણે બેટ્સમેનોના પ્રદર્શન અંગેના પ્રશ્નનો જવાબ પણ આપ્યો.

પાકિસ્તાન સામે ૮૮ રનની જીત બાદ મેચ પછીની પ્રેઝન્ટેશનમાં ટીમ ઈન્ડિયાની કેપ્ટન હરમનપ્રીત કૌરે કહ્યું, “હું આ જીતથી ખૂબ જ ખુશ છું. આ આપણા બધા માટે ખૂબ જ મહત્વપૂર્ણ મેચ હતી, અને મને ખાતરી છે કે ઘરે પાછા ફરનારા બધા પણ ખુશ હશે. અમારી બોલિંગ ઉત્તમ હતી. ક્રાંતિએ ખરેખર સારી બોલિંગ કરી; તે ઉત્તમ હતી, અને રેણુકાએ તેને સફળતા મેળવવામાં મદદ કરી. અમે ઘણી તકો બનાવી, કમનસીબે, અમે તેમને ચૂકી ગયા, પરંતુ અંતે, જ્યારે તમે જીતી જાઓ છો ત્યારે તમને ખુશી થાય છે. તે બેટિંગ કરવા માટે સરળ પિચ નહોતી; અમે લાંબા સમય સુધી બેટિંગ કરવા માંગતા હતા અને જોવા માંગતા હતા કે અમે કેટલા રન બનાવી શકીએ છીએ. રિચાએ ખરેખર સારી બેટિંગ કરી અને અમને મહત્વપૂર્ણ ૩૦ રન આપ્યા. હવે અમે ભારત પાછા જઈ રહ્યા છીએ. અમને ખબર છે કે ત્યાંની પિચો કેવી છે. અમે કોમ્બિનેશન અને અમે કઈ ટીમ સામે રમીશું તે જોઈશું.

પાકિસ્તાન સામેની જીત બાદ, ટીમ ઈન્ડિયા 9 ઓક્ટોબરે વિશાખાપટ્ટનમમાં દક્ષિણ આફ્રિકાની મહિલા ટીમ સામે પોતાની આગામી મેચ રમવા માટે ઘરે પરત ફરશે. ભારતીય મહિલા ટીમ હાલમાં ચાર પોઈન્ટ સાથે પોઈન્ટ ટેબલમાં ટોચના સ્થાને છે, જ્યારે દક્ષિણ આફ્રિકાની ટીમની શરૂઆત ખૂબ જ ખરાબ રહી હતી, તેને શરૂઆતની મેચમાં ઈંગ્લેન્ડ સામે એકતરફી હારનો સામનો કરવો પડ્યો હતો.