By ડીસા તાલુકાના જોરાપુરા ગામમાં પોલીસે દરોડો પાડી એક રહેણાંક મકાનમાંથી વિદેશી દારૂનો મોટો જથ્થો ઝડપી પાડ્યો છે. આ દરોડામાં કુલ ૯૦૮ બોટલ દારૂ અને બિયર મળી આવ્યા હતા, જેની કિંમત રૂ. ૨,૭૦,૭૯૧ આંકવામાં આવી છે. જોકે, આરોપી પોલીસ રેઇડ દરમિયાન હાજર ન મળતા તે ફરાર થઈ ગયો છે. પોલીસને બાતમી મળી હતી કે, જોરાપુરા ગામનો રહેવાસી સવસીજી શાંતીજી ઠાકોર પોતાના ઘરમાં વિદેશી દારૂનો જથ્થો રાખીને વેચાણ કરે છે. આ બાતમીના આધારે પોલીસે તાત્કાલિક કાર્યવાહી હાથ ધરી હતી.
પોલીસ ટુકડીએ બે પંચોને સાથે રાખીને સવસીજી ઠાકોરના ઘરે દરોડો પાડ્યો હતો. તપાસ દરમિયાન, ઘરની અંદર આવેલી એક ઓરડીમાં એક મોટો પટારો જોવા મળ્યો. પટારાને ખસેડતા, તેની પાછળની દિવાલમાં એક ગુપ્ત ખાનું બનાવેલું હતું. આ ખાનામાંથી પોલીસે ભારતીય બનાવટના વિદેશી દારૂ અને બિયરની બોટલો ભરેલી પેટીઓ તેમજ છૂટી બોટલો મળી આવી. દરોડા દરમિયાન, આરોપી સવસીજી ઠાકોર હાજર ન હતો અને ફરાર થઈ ગયો હતો. પોલીસે ઝડપેલા દારૂના જથ્થામાં જુદી-જુદી બ્રાન્ડની કુલ ૯૦૮ બોટલ હતી, જેની કુલ કિંમત રૂ. ૨,૭૦,૭૯૧ થાય છે. પોલીસે આ જથ્થો કબજે કરી કાયદેસરની કાર્યવાહી હાથ ધરી છે અને ફરાર આરોપીને પકડવા માટે તપાસ શરૂ કરી છે.
