By સુરક્ષા દળોએ ગુરુવારે નેપાળના મ્યાગડી જિલ્લામાં અન્નપૂર્ણા બેઝ કેમ્પ (ABC) નજીક ભારે હિમવર્ષા અને હિમપ્રપાતને કારણે ફસાયેલા 17 ભારતીય પ્રવાસીઓ સહિત 72 પર્વતારોહકોને બચાવ્યા. આ કામગીરી સશસ્ત્ર પોલીસ દળ (APF) અને નેપાળ પોલીસની સંયુક્ત ટીમ દ્વારા હાથ ધરવામાં આવી હતી, જેમાં સ્થાનિક સ્વયંસેવકોએ મુખ્ય ભૂમિકા ભજવી હતી. બચાવાયેલા તમામ પ્રવાસીઓ હવે સુરક્ષિત છે અને તેમને અન્નપૂર્ણા ગ્રામીણ મ્યુનિસિપાલિટીમાં રાખવામાં આવી રહ્યા છે.
સૂત્રોના જણાવ્યા અનુસાર, હિમપ્રપાતમાં ફસાયેલા તમામ વિદેશી પ્રવાસીઓ ભારતીય નાગરિકો હતા જેઓ “હિડન વેલી” તરીકે ઓળખાતા ધૌલાગિરી સર્કિટ ટ્રેકિંગ રૂટ પર હતા. આ રૂટ મ્યાગડી અને મુસ્તાંગ જિલ્લાઓને જોડે છે, પરંતુ સોમવાર રાતથી શરૂ થયેલા સતત વરસાદ અને હિમવર્ષાને કારણે ટ્રેક રૂટ સંપૂર્ણપણે બંધ થઈ ગયો હતો. આ ઊંચાઈવાળા પ્રદેશમાં તાપમાન ઝડપથી ઘટી ગયું, જેનાથી પ્રવાસીઓના જીવન જોખમમાં મુકાયા. મુસ્તાંગથી તૈનાત એક ખાસ બચાવ ટીમે 4,190 મીટરની ઊંચાઈથી દરેકને સુરક્ષિત રીતે બચાવ્યા.
નાયબ પોલીસ અધિક્ષક લીલ બહાદુર ભુજેલે જણાવ્યું હતું કે, “અમારી ટીમે અવરોધિત રસ્તાઓ પરથી બરફ સાફ કર્યો અને તમામ પ્રવાસીઓને સલામત સ્થળે ખસેડ્યા. આ કામગીરીમાં કોઈ જાનહાનિ થઈ નથી.” એપીએફના એક વરિષ્ઠ અધિકારીએ જણાવ્યું હતું કે ખરાબ હવામાનને કારણે પ્રવાસીઓ પાછા ફરી શક્યા નથી, પરંતુ હવે તેઓ સ્થાનિક લોજમાં રોકાઈ રહ્યા છે. હવામાન સાફ થયા પછી તેઓ કાઠમંડુ પાછા ફરી શકશે અને પછી તેમના ઘરે જવા રવાના થશે.
મ્યાગડીના મુખ્ય જિલ્લા અધિકારી બદ્રી પ્રસાદ તિવારીએ સલામતીના કારણોસર 31 ઓક્ટોબર સુધી અન્નપૂર્ણા બેઝ કેમ્પ સુધી ટ્રેકિંગ પર સંપૂર્ણ પ્રતિબંધ લાદ્યો છે. “સતત હિમવર્ષા અને સંભવિત જોખમોને ધ્યાનમાં રાખીને આ પગલું લેવામાં આવ્યું છે. પ્રવાસીઓને હવામાનની આગાહી તપાસવાની સલાહ આપવામાં આવે છે,” તેમણે કહ્યું. આ વિસ્તારમાં વધુ અકસ્માતો અટકાવવા માટે આ પ્રતિબંધ લાદવામાં આવ્યો છે.
