By ICC U19 મેન્સ વર્લ્ડ કપ 2026 માટે ઓસ્ટ્રેલિયાની ટીમની જાહેરાત કરવામાં આવી છે. ઓસ્ટ્રેલિયાએ આ ટુર્નામેન્ટ માટે પોતાની 15 સભ્યોની ટીમની જાહેરાત કરી છે. આ ટુર્નામેન્ટ 15 જાન્યુઆરીથી 6 ફેબ્રુઆરી દરમિયાન ઝિમ્બાબ્વે અને નામિબિયામાં રમાશે. ડિફેન્ડિંગ ચેમ્પિયન ઓસ્ટ્રેલિયા આ વખતે પોતાનું ટાઇટલ બચાવવાનું લક્ષ્ય રાખશે, જેમાં યુવા બેટ્સમેન ઓલિવર પીક ટીમનું નેતૃત્વ કરશે. દક્ષિણ આફ્રિકામાં 2024 માં રમાયેલા U19 વર્લ્ડ કપમાં ઓસ્ટ્રેલિયાની જીતમાં ઓલિવર પીકે મુખ્ય ભૂમિકા ભજવી હતી. ટૂર્નામેન્ટની શરૂઆતમાં તેને ઇજાગ્રસ્ત ખેલાડીના સ્થાને ટીમમાં સામેલ કરવામાં આવ્યો હતો. તેણે ચાર ઇનિંગ્સમાં 120 રન બનાવ્યા. તેણે ફાઇનલમાં ભારત સામે 46* રનની મહત્વપૂર્ણ ઇનિંગ્સ રમી હતી.
ડાબોડી બેટ્સમેન પીકે પણ તાજેતરમાં ઇંગ્લેન્ડ સામેની પીએમ ઇલેવન મેચમાં શાનદાર અડધી સદી ફટકારી હતી. ઓલિવર પીક ઓસ્ટ્રેલિયાની વર્લ્ડ કપ ટીમમાં એકમાત્ર ખેલાડી છે જે અગાઉના U19 વર્લ્ડ કપ ટીમનો ભાગ હતો. આ કારણે તેને ટીમનો કેપ્ટન બનાવવામાં આવ્યો છે. ટીમમાં વિલ માલાજચુક, નિતેશ સેમ્યુઅલ અને ફાસ્ટ બોલર વિલિયમ ટેલરનો પણ સમાવેશ થાય છે, જે ટુર્નામેન્ટમાં મહત્વપૂર્ણ ભૂમિકા ભજવશે.
ઓસ્ટ્રેલિયન ટીમનું કોચિંગ ટિમ નીલ્સન કરશે અને તેમનું માનવું છે કે ટીમ સતત બે ટાઇટલ જીતવા માટે ખૂબ સંતુલિત છે. નીલ્સને કહ્યું, “અમને ICC અંડર-19 વર્લ્ડ કપ માટે એક મજબૂત અને સંતુલિત ટીમની જાહેરાત કરતા આનંદ થાય છે. અમારું ધ્યાન એવી ટીમ પસંદ કરવા પર છે જેમાં કુશળતા હોય. પસંદ કરાયેલા ખેલાડીઓએ સપ્ટેમ્બરમાં ભારત સામેની U19 શ્રેણી અને પર્થમાં તાજેતરમાં યોજાયેલી રાષ્ટ્રીય U19 ચેમ્પિયનશિપમાં તેમના પ્રદર્શનથી પ્રભાવિત કર્યા છે. આ ટુર્નામેન્ટ આ યુવા ખેલાડીઓ માટે વિશ્વ સમક્ષ પોતાને સાબિત કરવાની એક શ્રેષ્ઠ તક છે.” ક્રિકેટ ઓસ્ટ્રેલિયાના રાષ્ટ્રીય વિકાસ વડા, સોનિયા થોમ્પસન, એ જણાવ્યું હતું કે, “આ ટીમ અનુભવ અને નવી પ્રતિભાના મિશ્રણનું એક ઉત્તમ ઉદાહરણ છે.”
