By અક્ષય કુમાર અને વીર પહરિયાની ફિલ્મ ‘સ્કાય ફોર્સ’ 24 જાન્યુઆરીએ સિનેમાઘરોમાં રિલીઝ થઈ હતી. આ ફિલ્મમાં નિમરત કૌર અને સારા અલી ખાન પણ લીડ રોલમાં છે. 2025માં અક્ષય કુમારની આ પહેલી ફિલ્મ તેમજ વર્ષની પહેલી મોટી રિલીઝ છે. ફિલ્મને દર્શકોનો સારો પ્રતિસાદ મળી રહ્યો છે અને મોટી સંખ્યામાં દર્શકો તેને જોવા માટે આવી રહ્યા છે. ફિલ્મે પહેલા વીકેન્ડમાં જ સારી કમાણી કરી છે. આંકડાઓ જોયા પછી તમે કહેશો કે હવે લાગે છે કે અક્ષય કુમારનું સૂતેલું નસીબ જાગવાનું છે. 10 ફ્લોપ ફિલ્મો આપનાર અક્ષય કુમાર બે વર્ષ બાદ સફળ ફિલ્મ આપવાના અણી પર હોય તેમ લાગી રહ્યું છે. અત્યારે તો એક નજર કરીએ આ ફિલ્મે ત્રણ દિવસમાં કેટલી કમાણી કરી છે.
સંદીપ કેવલાની અને અભિષેક અનિલ કપૂર દ્વારા સંયુક્ત રીતે દિગ્દર્શિત ‘સ્કાય ફોર્સ’એ તેના પ્રથમ દિવસે 12.25 કરોડ રૂપિયાની કમાણી કરી હતી. પહેલા દિવસની કમાણી સંતોષજનક હતી, પરંતુ બીજા દિવસે તેની કમાણીમાં જોરદાર ઉછાળો જોવા મળ્યો હતો. ફિલ્મે બીજા દિવસે લગભગ 22 કરોડ રૂપિયાની કમાણી કરી છે. ત્રીજા દિવસે એટલે કે રવિવારે અને ગણતંત્ર દિવસના અવસર પર ફિલ્મે 27.50 કરોડની કમાણી કરી હતી. આ સાથે ફિલ્મે ત્રણ દિવસમાં દેશભરમાં 61.75 કરોડ રૂપિયાની કમાણી કરી છે. પ્રથમ બે દિવસની સરખામણીએ ત્રીજા દિવસે ફિલ્મને નોંધપાત્ર રીતે વધુ દર્શકો મળ્યા હતા. હવે ફિલ્મ સોમવારે ટેસ્ટનો સામનો કરી રહી છે. જો ફિલ્મ આગામી સપ્તાહમાં સારી કમાણી કરતી રહેશે તો તે 10 દિવસમાં તેનું બજેટ સાફ કરી દેશે.
ફિલ્મ બજેટ
કહેવામાં આવી રહ્યું છે કે અક્ષય કુમાર અને વીર પહરિયાની ફિલ્મ ‘સ્કાય ફોર્સ’નું બજેટ લગભગ 150 કરોડ રૂપિયા છે. ફિલ્મના VFX બનાવવાની કિંમતમાં નોંધપાત્ર વધારો થયો છે. હાલમાં, ફિલ્મ હજી પણ તેના મુકામથી દૂર છે, પરંતુ જો કમાણી આ જ ગતિએ ચાલુ રહે છે, તો આશા છે કે ટૂંક સમયમાં અક્ષય કુમારના ખાતામાં તેની વર્ષ 2025 ની પ્રથમ સફળ ફિલ્મ હશે. છેલ્લા 2 વર્ષમાં અક્ષય કુમારે સતત 10 ફ્લોપ ફિલ્મો આપી છે. તેમની 11 ફિલ્મોમાંથી માત્ર 1 જ સફળ રહી હતી. આવી સ્થિતિમાં આ ફિલ્મ તેનું ભાગ્ય બદલી શકે છે.
