આજથી વાહન ચલાવવું મોંઘુ સીએનજી ના ભાવમાં વધારો કોમર્શિયલ એલપીજી સિલિન્ડર પણ મોંઘા

ગુજરાત ગેસે સીએનજીના ભાવમાં વધારો કરવાની જાહેરાત કરી છે. કંપનીએ આજથી એટલે કે 1 ડિસેમ્બરથી CNGના ભાવમાં 1.5 રૂપિયાનો વધારો કર્યો છે. જેના કારણે ગુજરાતમાં CNGની કિંમત હવે વધીને 77.76 રૂપિયા પ્રતિ કિલો થઈ ગઈ છે. ગુજરાત ગેસે તેના ફ્રેન્ચાઇઝ માલિકોને પત્ર મોકલીને આ માહિતી આપી છે. અગાઉ જુલાઈમાં સીએનજીના ભાવમાં 1 રૂપિયાનો વધારો થયો હતો. ઓગસ્ટમાં પણ કિંમતમાં ફરી એક રૂપિયાનો વધારો કરવામાં આવ્યો હતો. સીએનજીના આ નવા ભાવ મધરાતથી લાગુ થઈ ગયા છે.

સીએનજી વાહન વપરાશકારોને અસર કરશે

કિંમતોમાં આ વધારો દક્ષિણ ગુજરાતના 4 લાખથી વધુ સીએનજી વાહન વપરાશકારોને અસર કરશે. તમને જણાવી દઈએ કે સુરતમાં 60 CNG પંપ અને દક્ષિણ ગુજરાતમાં 250 CNG પંપ છે. CNG નો ઉપયોગ મોટાભાગે ઓટો રિક્ષા અને સ્કૂલ વાનમાં થાય છે. જેના કારણે સ્કૂલ વાન સંચાલકોએ તેમના ચાર્જમાં વધારો કરવો પડી શકે છે.

કોમર્શિયલ એલપીજી સિલિન્ડરના ભાવમાં વધારો

બીજી તરફ મહિનાના પહેલા દિવસે સરકારી ઓઈલ કંપનીઓએ કોમર્શિયલ એલપીજી સિલિન્ડરના ભાવમાં વધારો કર્યો છે. જોકે, ઘરેલુ એલપીજી સિલિન્ડરની કિંમતમાં કોઈ ફેરફાર કરવામાં આવ્યો નથી. 19 કિલોના એલપીજી સિલિન્ડરની કિંમતમાં 16.50 રૂપિયાનો વધારો થયો છે. 19 કિલોનું કોમર્શિયલ એલપીજી સિલિન્ડર હવે દિલ્હીમાં 1818.50 રૂપિયામાં મળશે. દિલ્હી સિવાય કોલકાતામાં કોમર્શિયલ ગેસ સિલિન્ડરની કિંમત હવે 1927.00 રૂપિયા થઈ ગઈ છે. આ ગેસ સિલિન્ડર મુંબઈમાં ₹1771.00 અને ચેન્નાઈમાં ₹1980.50માં ઉપલબ્ધ છે.