યુપી સરકારે તમામ જિલ્લા મેજિસ્ટ્રેટને રેવન્યુ રેકોર્ડમાં નોંધ ન હોય,નિયમો વિરુદ્ધ વક્ફ તરીકે જાહેર કરેલી મિલકતોને ઓળખવા માટે ઝુંબેશ ચલાવવા સૂચના આપી

(જી.એન.એસ) તા.4

લખનૌ,

વક્ફ સુધારા બિલ 2025 લોકસભા અને રાજ્યસભા બંને ગૃહો દ્વારા પસાર કરવામાં આવ્યું છે. બંને ગૃહોમાં વક્ફ એમેન્ડમેન્ટ બિલ પાસ થયા બાદ હવે યોગી સરકારે વક્ફ બોર્ડ દ્વારા ગેરકાયદે જાહેર કરેલી મિલકતો સામે કડક વલણ અપનાવવાનું શરૂ કરી દીધું છે. સરકારે તમામ જિલ્લા મેજિસ્ટ્રેટને રેવન્યુ રેકોર્ડમાં નોંધ ન હોય તેમજ નિયમો વિરુદ્ધ વક્ફ તરીકે જાહેર કરેલી મિલકતોને ઓળખવા માટે ઝુંબેશ ચલાવવા સૂચના આપી છે. આ મિલકતોની ઓળખ બાદ તેની જપ્તીની કાર્યવાહી હાથ ધરવામાં આવશે.

આ બાબતે મીડિયા સૂત્રો દ્વારા માહિતી અનુસાર મહેસૂલ વિભાગ મુજબ ઉત્તર પ્રદેશમાં વક્ફ બોર્ડ દ્વારા દાવો કરવામાં આવેલી મોટાભાગની મિલકતોનો કોઈ સત્તાવાર રેકોર્ડ નથી. રેવન્યુ રેકોર્ડ મુજબ સુન્ની વક્ફ બોર્ડની 2533 મિલકતો અને શિયા વક્ફ બોર્ડની માત્ર 430 મિલકતો સત્તાવાર રીતે નોંધાયેલી છે. જ્યારે વક્ફ બોર્ડ દ્વારા જાહેર કરાયેલા આંકડા આના કરતા ઘણા વધારે છે. સુન્ની વક્ફ બોર્ડ પાસે 1,24,355 મિલકતો છે અને શિયા વક્ફ બોર્ડ પાસે 7,785 મિલકતો છે.

રાજ્યમાં તળાવ, કોઠાર અને ગ્રામ્ય સમાજની જમીનોને પણ વક્ફ તરીકે જાહેર કરવામાં આવી છે, જેને સરકારે સંપૂર્ણપણે ગેરકાયદે ગણાવી છે. અધિકારીઓનું કહેવું છે કે સરકારી જમીન, ગામની સામુદાયિક જમીન અને જાહેર મિલકતોને કોઈપણ સંજોગોમાં વક્ફ જાહેર કરી શકાય નહીં. ફક્ત તે જ મિલકતોને વક્ફ તરીકે ગણવામાં આવશે જે વ્યક્તિ દ્વારા સ્પષ્ટપણે દાન કરવામાં આવી હોય.

તેમજ આ મામલે સૂત્રો થકી પ્રાપ્ત માહિતી મુજબ, અમુક જિલ્લાઓમાં તો તળાવ, ગોચર, કોઠાર અને જાહેર ઉપયોગની જમીનોને વક્ફ જાહેર કરીને કબજે કરવામાં આવી હતી. હવે આવા કેસોમાં કડક તપાસ બાદ જમીનને સરકારી મિલકત જાહેર કરીને પરત આપવામાં આવશે. સરકારે સ્પષ્ટ કર્યું છે કે વક્ફને ગેરકાયદે જાહેર કરવામાં આવેલી દરેક મિલકત સામે કાયદેસરની કાર્યવાહી કરવામાં આવશે, અને દોષિતોને પણ જવાબદાર ગણવામાં આવશે.