By રશિયા-યુક્રેન વચ્ચે યુદ્ધવિરામ કરાવવામાં અત્યાર સુધી સફળ ન થયેલા યુએસ રાષ્ટ્રપતિ ડોનાલ્ડ ટ્રમ્પ વ્લાદિમીર પુતિન સાથે મોટી તકરારમાં ફસાઈ ગયા છે. ટ્રમ્પે ફ્રાન્સમાં એક રશિયન બાસ્કેટબોલ ખેલાડીની ધરપકડ કરાવી છે. આનાથી બંને દેશો વચ્ચે તણાવ વધી શકે છે. રશિયન એજન્સી RT.com અનુસાર, ફ્રાન્સે યુએસની વિનંતી પર રશિયન બાસ્કેટબોલ ખેલાડીની અટકાયત કરી છે.
ફ્રાન્સે અમેરિકાની વિનંતી પર આ ખેલાડીની ધરપકડ કરી અને ત્યારબાદ અટકાયતમાં લીધો, તેનું નામ ડેનિલ કાસાટકીન છે. તેના પર રેન્સમવેર ગેંગનો સભ્ય હોવાનો આરોપ છે. ફ્રાન્સે કહ્યું કે રશિયન બાસ્કેટબોલ ખેલાડી ડેનિલ કાસાટકીનને અમેરિકાની વિનંતી પર અટકાયતમાં લેવામાં આવ્યો છે. રશિયન રાષ્ટ્રીય ટીમ માટે પોઈન્ટ ગાર્ડ રમનારા કાસાટકીનને 21 જૂને ચાર્લ્સ ડી ગૌલ એરપોર્ટ પર તેની મંગેતર સાથે ફ્રાન્સ પહોંચ્યા ત્યારે ધરપકડ કરવામાં આવી હતી. બુધવારે સુનાવણીમાં, એક ન્યાયાધીશે ચુકાદો આપ્યો કે પ્રત્યાર્પણ કાર્યવાહી સુધી તેને કસ્ટડીમાં રાખવામાં આવશે.
યુએસ અધિકારીઓનો આરોપ છે કે કાસાટકીને યુએસમાં અભ્યાસ કર્યો હતો. તે દરમિયાન તેણે હેકર ગેંગ વતી ખંડણીની રકમ નક્કી કરવામાં ભૂમિકા ભજવી હતી. આ ગેંગે 2020 થી 2022 દરમિયાન લગભગ 900 કંપનીઓ અને બે ફેડરલ સંસ્થાઓને નિશાન બનાવી છે. જોકે, કાસાટકીને કોઈપણ ગુનાનો ઇનકાર કર્યો છે. તેમના વકીલ ફ્રેડરિક બેલોટે પત્રકારોને જણાવ્યું હતું કે કાસાટકિનને “કમ્પ્યુટરનું ખૂબ ઓછું જ્ઞાન” છે અને તેમણે જે જૂનું કમ્પ્યુટર ખરીદ્યું હતું તે કાં તો પહેલાથી જ હેક કરવામાં આવ્યું હતું અથવા કોઈ બીજાના નામે હેકરે તેને વેચી દીધું હતું.
