શું એશિયા કપથી પહેલાં મિકી આર્થર અને બાકીનાં કોચિંગ સ્ટાફ રજા પર રહેશે? PCB એ લીધો નિર્ણય

એશિયા કપ શરૂ થવામાં વધારે સમય નથી. 30 ઓગસ્ટથી આ ટુર્નામેન્ટ શરૂ થશે. આ ટુર્નામેન્ટ પહેલાં પાકિસ્તાની ક્રિકેટ બોર્ડે એક મોટો નિર્ણય લીધો છે. બોર્ડ દ્વારા ટીમના કોચિંગ સ્ટાફને લઈને આ નિર્ણય લેવામાં આવ્યો છે. બોર્ડે ટીમના કોચિંગ સ્ટાફ અને મેનેજમેન્ટ સ્ટાફમાં કોઈ પણ પ્રકારનો ફેરફાર કર્યો નથી. એવાં સમાચાર હતાં કે કોચિંગ સ્ટાફમાં ફેરફાર થઈ શકે છે પરંતુ PCB એ સ્પષ્ટ કર્યું છે કે એશિયા કપ અને વર્લ્ડ કપને ધ્યાનમાં રાખીને એવો કોઈ ફેરફાર કરવામાં આવશે નહીં.

એનો અર્થ એ છે કે ટીમના ડાયરેક્ટર મિકી આર્થર પોતાનાં પદ પર રહેશે. તેમની સાથે જ ટીમના કોચ ગ્રાંટ બ્રેડબર્ન અને ટીમ મેનેજર રેહાન ઉલ હક પણ પોત-પોતાના પદ પર રહેશે. ટીમના બોલિંગ કોચ મોર્ને મોર્કેલ, બેટિંગ કોચ એન્ડ્રુ પુટેક અને ફિલ્ડિંગ કોચ આફતાબ ખાનને પણ યથાવત રાખવામાં આવ્યા છે.

ખરેખર, એવા અહેવાલો હતા કે PCBમાં ફેરફારને કારણે આ લોકોને રજા આપવામાં આવી શકે છે. તાજેતરમાં, ઝકા અશરફે PCBના અધ્યક્ષનું પદ સંભાળ્યું છે જ્યારે કોચિંગ સ્ટાફની નિમણૂક નજમ સેઠી દ્વારા કરવામાં આવી હતી, જેઓ અશરફ પહેલા બોર્ડના અધ્યક્ષ હતા. એટલા માટે એવા અહેવાલો હતા કે કોચિંગ સ્ટાફમાં ફેરફાર થઈ શકે છે. સામાન્ય રીતે પીસીબીમાં એવું જોવામાં આવે છે કે જે પણ નવો ચેરમેન આવે છે, તે પોતાની રીતે ફેરફાર કરે છે. ઝકા અશરફના આવ્યા પછી પણ આ વાત સમજાઈ રહી હતી.

તેણે ફેરફારો પણ કર્યા અને ફરી એકવાર ઈન્ઝમામ-ઉલ-હકને ચીફ સિલેક્ટરની જવાબદારી સોંપી. સમાચાર એજન્સી પીટીઆઈ અનુસાર, અશરફને સલાહ આપવામાં આવી હતી કે આગળ બે મોટી ટૂર્નામેન્ટ છે અને આવી સ્થિતિમાં ફેરફાર કરવો જોખમી હોઈ શકે છે. એટલા માટે કોચિંગ સ્ટાફને વર્લ્ડ કપ સુધી જાળવી રાખવો જોઈએ.

પુરૂષ ટીમના કોચિંગ સ્ટાફમાં કોઈ ફેરફાર કરવામાં આવ્યો નથી, પરંતુ મહિલા ટીમના કોચિંગ સ્ટાફમાં ફેરફાર કરવામાં આવ્યા છે. પાકિસ્તાન મહિલા ટીમના મુખ્ય કોચ માર્ક કોલ્સે પોતાના પદ પરથી રાજીનામું આપી દીધું છે. માર્કની નિમણૂક સેઠી દ્વારા કરવામાં આવી હતી અને તેણે અંગત કારણોસર પદ છોડ્યું છે.તે દક્ષિણ આફ્રિકા સામેની સિરીઝ માટે ઉપલબ્ધ રહેશે નહીં. તે જ સમયે, પીટીઆઈએ તેના અહેવાલમાં સૂત્રોને ટાંકીને લખ્યું છે કે માર્કને તેમનું પદ છોડવા માટે કહેવામાં આવ્યું હતું.