By કોંગ્રેસના પૂર્વ અધ્યક્ષ અને લોકસભામાં વિરોધ પક્ષના નેતા રાહુલ ગાંધી આજે તેમનો 55મો જન્મદિવસ ઉજવી રહ્યા છે. આ પ્રસંગે વડા પ્રધાન નરેન્દ્ર મોદીએ કોંગ્રેસના નેતાને અભિનંદન પાઠવ્યા છે. પીએમ મોદીએ તેમના સોશિયલ મીડિયા હેન્ડલ ‘X’ પર લખ્યું છે કે, લોકસભામાં વિરોધ પક્ષના નેતા શ્રી રાહુલ ગાંધીને જન્મદિવસની હાર્દિક શુભકામનાઓ. હું તેમના લાંબા અને સ્વસ્થ જીવનની કામના કરું છું.
રાહુલ ગાંધીનો જન્મ ૧૯ જૂન, ૧૯૭૦ ના રોજ નવી દિલ્હીમાં થયો હતો. તેઓ ભૂતપૂર્વ વડા પ્રધાન રાજીવ ગાંધી અને ભૂતપૂર્વ કોંગ્રેસ પ્રમુખ સોનિયા ગાંધીના સૌથી મોટા સંતાન છે. હાલમાં, તેઓ ઉત્તર પ્રદેશના રાયબરેલીથી લોકસભા સભ્ય અને વિરોધ પક્ષના નેતા છે.
તમને જણાવી દઈએ કે રાહુલ ગાંધી ભારતીય રાષ્ટ્રીય કોંગ્રેસના પ્રમુખ રહી ચૂક્યા છે. રાહુલ ગાંધીએ ભારત અને વિદેશમાં શિક્ષણ મેળવ્યું છે. તેમણે ફ્લોરિડાના રોલિન્સ કોલેજમાંથી સ્નાતક થયા છે અને કેમ્બ્રિજ યુનિવર્સિટીના ટ્રિનિટી કોલેજમાંથી એમ.ફિલ. ડિગ્રી મેળવી છે. અભ્યાસ પછી, તેમણે લંડનમાં એક કન્સલ્ટિંગ ફર્મ, મોનિટર ગ્રુપ, સાથે થોડો સમય કામ કર્યું અને બાદમાં ભારત આવ્યા અને મુંબઈમાં ટેકનોલોજી આઉટસોર્સિંગ કંપની, બેકઓપ્સ સર્વિસીસ પ્રાઇવેટ લિમિટેડની સ્થાપના કરવામાં મદદ કરી.
