Paksitan: ખૈબર પખ્તુનખ્વામાં એક જ પરિવારનાં 9 લોકોની હત્યા, બંદુકધારીઓએ ઘરમાં ઘૂસીને કર્યો અંધાધુધ ગોળીબાર
પાકિસ્તાનના ખૈબર પખ્તુનખ્વા પ્રાંતમાં બુધવારે એક હચમચાવી દેનારી ઘટના સામે આવી હતી. જ્યાં કેટલાક અજાણ્યા બંદૂકધારીઓએ એક ઘરમાં ઘૂસીને એક જ પરિવારના નવ લોકોની હત્યા કરી નાખી હતી. ઘટનાને અંજામ આપ્યા બાદ બદમાશો સ્થળ પરથી ફરાર થઈ ગયા હતા. મૃતકોમાં ત્રણ મહિલાઓ અને છ પુરૂષોનો સમાવેશ થાય છે. એવું કહેવામાં આવી રહ્યું છે કે બંદૂકધારીઓ ઓટોમેટિક હથિયારોથી સજ્જ હતા. ઘટના બાદ પોલીસ ઘટનાસ્થળે પહોંચી, મૃતદેહનો કબજો મેળવીને પોસ્ટમોર્ટમ માટે મોકલી આપ્યો. જો કે હજુ સુધી આ ઘટના પાછળનું કારણ શું છે તે જાણી શકાયું નથી. સ્થાનિક પોલીસે કહ્યું છે કે તે સમગ્ર મામલાની તપાસ કરી રહી છે અને આ ઘટના પાછળનું કારણ શું છે તે શોધી રહી છે.
જણાવવામાં આવી રહ્યું છે કે ઘટના આ મલાકંદ જિલ્લાના બટખેલા તાલુકાની છે. આજે સવારે કેટલાક અજાણ્યા બંદૂકધારીઓ આવ્યા અને સીધા ઘરમાં ઘૂસી ગયા. ઘરમાં પ્રવેશતાની સાથે જ તેણે અંધાધૂંધ ગોળીબાર શરૂ કરી દીધો હતો. હજુ સુધી એ જાણી શકાયું નથી કે ઘરમાં માત્ર 9 લોકો હતા કે વધુ સભ્યો હતા.
જણાવી દઈએ કે છેલ્લા બે મહિનામાં પખ્તુનખ્વા પ્રાંતમાં ફાયરિંગની આ બીજી ઘટના છે. એપ્રિલ મહિનામાં ખુર્રમ જિલ્લામાં ગોળીબારની ઘટનામાં સાત લોકો માર્યા ગયા હતા અને તે તમામ શિક્ષકો હતા. જ્યારે શિક્ષકો પરીક્ષા માટે પેપરનો સેટ તૈયાર કરી રહ્યા હતા ત્યારે તેમના પર હુમલો કરવામાં આવ્યો હતો. ત્યારે કેટલાક કાર સવાર હુમલાખોરો શાળાની બહારના બેરિકેડ તોડીને શાળામાં ઘૂસ્યા અને સીધા રૂમમાં ગયા જ્યાં શિક્ષકો પેપરનો સેટ તૈયાર કરી રહ્યા હતા. હુમલા સમયે પોલીસ કર્મચારીઓ પણ શાળાની બહાર હતા, પરંતુ ગોળીબારનો અવાજ સાંભળીને તેઓ પણ પૂંછડી દબાવીને ભાગી ગયા હતા.