ટીમ ઇન્ડીયામાં જસપ્રીત બુમરાહની વાપસી! વર્લ્ડ કપ 2023 પહેલા સામે આવ્યા મહત્વના સમાચાર 

ટીમ ઈન્ડિયાનો ઘાતક ફાસ્ટ બોલર જસપ્રીત બુમરાહ ગયા વર્ષે સપ્ટેમ્બરમાં ઓસ્ટ્રેલિયા સામેની ટી-20 શ્રેણી બાદથી મેદાનની બહાર છે. જસપ્રીત બુમરાહ લાંબા સમયથી ઈજા સામે ઝઝૂમી રહ્યો છે. જ્યારે, ટીમ ઈન્ડિયાએ આ વર્ષે એશિયા કપ અને ODI વર્લ્ડ કપ જેવી મોટી ટૂર્નામેન્ટ રમી છે. આવી સ્થિતિમાં જસપ્રીત બુમરાહની વાપસીને લઈને એક મોટું અપડેટ સામે આવ્યું છે. બુમરાહ ટૂંક સમયમાં એક્શનમાં જોવા મળી શકે છે.

જસપ્રીત બુમરાહ હાલમાં નેશનલ ક્રિકેટ એકેડમી (NCA)માં તાલીમ લઈ રહ્યો છે. નેટ પ્રેક્ટિસ દરમિયાન તે દરરોજ 7-8 ઓવર પણ ફેંકી રહ્યો છે. મીડિયા રિપોર્ટ્સ અનુસાર, જો બધુ બરાબર રહ્યું તો જસપ્રીત બુમરાહને આવતા મહિને આયર્લેન્ડમાં યોજાનારી T20 સિરીઝ માટે ટીમ ઈન્ડિયાની ટીમમાં સામેલ કરવામાં આવી શકે છે. ટીમ મેનેજમેન્ટ સપ્ટેમ્બરમાં એશિયા કપ માટે બુમરાહને ટીમમાં સામેલ કરવા માંગતી  હતી અને તે પછી વનડે વર્લ્ડ કપ પણ રમવાનો છે.

જસપ્રીત બુમરાહે ન્યુઝીલેન્ડના ક્રાઈસ્ટચર્ચ શહેરમાં પીઠની સર્જરી કરાવી હતી. જસપ્રીત બુમરાહની પીઠની સર્જરી ક્રાઈસ્ટચર્ચની ફોર્ટ ઓર્થોપેડિક્સ હોસ્પિટલના જાણીતા ઓર્થોપેડિક સર્જન ડૉ. રોવાન સ્કાઉટન દ્વારા કરવામાં આવી હતી. જસપ્રીત બુમરાહ હાલમાં BCCI ક્રિકેટ ચીફ વીવીએસ લક્ષ્મણની દેખરેખ હેઠળ NCAમાં પુનર્વસન હેઠળ છે. તમને જણાવી દઈએ કે ટીમ ઈન્ડિયા આયર્લેન્ડ પ્રવાસ પર 18 થી 23 ઓગસ્ટ વચ્ચે 3 T20 મેચ રમવાની છે.

જસપ્રીત બુમરાહે ટીમ ઈન્ડિયા માટે અત્યાર સુધીમાં 30 ટેસ્ટ મેચ, 72 ODI અને 60 T20 મેચ રમી છે. તેણે ટેસ્ટમાં 128 વિકેટ, વનડેમાં 121 વિકેટ અને ટી20માં 70 વિકેટ લીધી છે. જસપ્રીત બુમરાહને હાલમાં ભારતના સૌથી સફળ બોલરોમાંથી એક ગણવામાં આવે છે. બુમરાહને જુલાઈ 2022માં ઈંગ્લેન્ડના પ્રવાસ પછી કમરનું ‘સ્ટ્રેસ ફ્રેક્ચર’ થયું હતું. આ ઈજાના કારણે તે સતત ટીમમાંથી બહાર થઈ રહ્યો છે.