NEET પેપર લીક કેસમાં CBIએ ગુજરાતના 4 જિલ્લા સહિત 7 સ્થળો પર દરોડા, એક આરોપીની ધરપકડ
NEET પેપર લીક કેસમાં CBIએ ગુજરાતના ચાર જિલ્લા સહિત સાત સ્થળોએ દરોડા પાડ્યા છે. સૂત્રોએ જણાવ્યું કે સીબીઆઈ દ્વારા આજે સવારથી ગોધરા, ખેડા, આણંદ અને અમદાવાદ સહિત સાત સ્થળોએ દરોડા પાડવામાં આવી રહ્યા છે. અધિકારીઓએ જણાવ્યું હતું કે આણંદ, ખેડા, અમદાવાદ અને ગોધરા એમ ચાર જિલ્લાઓમાં શંકાસ્પદ જગ્યાઓ પર સવારે દરોડા પાડવામાં આવ્યા હતા.
CBIએ એક વ્યક્તિની ધરપકડ કરી
તે જ સમયે હજારીબાગમાંથી પત્રકાર જમાલુદ્દીનની પણ સીબીઆઈ દ્વારા ધરપકડ કરવામાં આવી હતી. જમાલુદ્દીન પર પ્રિન્સિપાલ અને વાઈસ પ્રિન્સિપાલની મદદ કરવાનો આરોપ છે. સૂત્રોએ જણાવ્યું કે જમાલુદ્દીન ફોન દ્વારા પ્રિન્સિપાલના સતત સંપર્કમાં હતો. કોલ ડિટેલ્સ અને પૂછપરછ દ્વારા સીબીઆઈને જાણવા મળ્યું કે તે પેપર લીકમાં પ્રિન્સિપાલ અને વાઈસ પ્રિન્સિપાલની મદદ કરી રહ્યો હતો.
શાળાના આચાર્ય અને વાઇસ પ્રિન્સિપાલની ધરપકડ
જણાવી દઈએ કે, શુક્રવારે સીબીઆઈએ NEET-UG પેપર લીક કેસમાં ઝારખંડના હજારીબાગ સ્થિત એક સ્કૂલના પ્રિન્સિપાલ અને વાઈસ પ્રિન્સિપાલની ધરપકડ કરી હતી. ઓએસિસ સ્કૂલના પ્રિન્સિપાલ એહસાનુલ હકને 5 મેના રોજ નેશનલ ટેસ્ટિંગ એજન્સી (NTA) દ્વારા આયોજિત મેડિકલ પ્રવેશ પરીક્ષા NEET-UG માટે હજારીબાગના સિટી કોઓર્ડિનેટર બનાવવામાં આવ્યા હતા, અધિકારીઓએ જણાવ્યું હતું. તેમણે કહ્યું કે વાઈસ-પ્રિન્સિપાલ ઈમ્તિયાઝ આલમને NTAના સુપરવાઈઝર અને ઓએસિસ સ્કૂલના સેન્ટર કો-ઓર્ડિનેટર તરીકે નિયુક્ત કરવામાં આવ્યા છે. અધિકારીઓએ જણાવ્યું કે સીબીઆઈ પેપર લીક કેસના સંબંધમાં જિલ્લામાંથી વધુ પાંચ લોકોની પણ પૂછપરછ કરી રહી છે.