ઈરાનના રાષ્ટ્રપતિ રાઈસીના મૃત્યુ બાદ ઈરાનમાં ક્યારે યોજાશે રાષ્ટ્રપતિની ચૂંટણી? જાણો અહીં સંપૂર્ણ પ્રક્રિયા અને શેડ્યૂલ

ઈરાનના રાષ્ટ્રપતિ ઈબ્રાહિમ રાઈસીના અવસાન બાદ રાષ્ટ્રપતિની બેઠક ખાલી થઈ ગઈ છે. હવે ઈરાની સરકારની ત્રણ શાખાઓના વડાઓ દેશમાં ત્વરિત રાષ્ટ્રપતિ ચૂંટણી માટે 28 જૂનની તારીખે સંમત થયા છે. તેહરાનમાં પ્રેસિડેન્સી ઓફિસમાં યોજાયેલી બેઠક દરમિયાન તારીખની પુષ્ટિ કરવામાં આવી હતી.

આ બેઠકમાં ઈરાનની કાર્યકારી શાખાના વડા મોહમ્મદ મોખ્બર, સંસદના અધ્યક્ષ મોહમ્મદ બાઘેર ગાલિબાફ અને ન્યાયતંત્રના વડા ગુલામ-હુસેન મોહસેની-એઝેઈએ હાજરી આપી હતી. પૂર્વ અઝરબૈજાન પ્રાંતમાં હેલિકોપ્ટર દુર્ઘટનામાં રાષ્ટ્રપતિ રાયસીના મૃત્યુ બાદ ત્રણ અધિકારીઓ વચ્ચેના કલાકોમાં આ સત્ર બીજી બેઠક હતી.

ઈરાનના બંધારણની કલમ 131 મુજબ દેશના ટોચના ત્રણ અધિકારીઓને વર્તમાન રાષ્ટ્રપતિના મૃત્યુ અથવા અપંગતાના 50 દિવસની અંદર રાષ્ટ્રપતિની ચૂંટણીની વ્યવસ્થા કરવાનો આદેશ આપવામાં આવ્યો છે. સોમવારે મળેલી બેઠકમાં ઈરાનના કાનૂની બાબતોના વાઇસ પ્રેસિડેન્ટ મોહમ્મદ દેહખાન, ગાર્ડિયન કાઉન્સિલના વાઇસ પ્રેસિડેન્ટ સિયામક રહપાયકંદ અને રાજકીય બાબતોના નાયબ ગૃહ પ્રધાન મોહમ્મદ તાગી શાહચેરાગીની હાજરી જોવા મળી હતી.

ઈરાનમાં ચૂંટણી કેવી રીતે યોજાય છે? ઈરાનમાં દર 4 વર્ષે ચૂંટણી યોજાય છે. છેલ્લી ચૂંટણી 2021માં થઈ હતી. જો કે આ વખતે ઈબ્રાહિમ રાયસીના નિધન બાદ ટૂંક સમયમાં ચૂંટણી યોજાશે. ગાર્ડિયન કાઉન્સિલ ઈરાનમાં ચૂંટણીઓ યોજે છે. તે સર્વોચ્ચ નેતાની દેખરેખ હેઠળ 6 ઇસ્લામિક ન્યાયાધીશો અને 6 વરિષ્ઠ મૌલવીઓની પેનલ છે.