લોકસભા ચૂંટણી 2024ના 5મા તબક્કામાં 8 રાજ્યો અને કેન્દ્રશાસિત પ્રદેશોની 49 લોકસભા બેઠકો પર મતદાન

2024ની લોકસભા ચૂંટણીના પાંચમા તબક્કામાં 6 રાજ્યો અને 2 કેન્દ્રશાસિત પ્રદેશોની 49 બેઠકો પર આજે સવારે 7 વાગ્યાથી મતદાન ચાલુ છે. જે સાંજે 6 વાગ્યા સુધી ચાલુ રહેશે.

11 વાગ્યા સુધી 23.66% મતદાન નોંધાયું છે. સૌથી વધુ મતદાન પશ્ચિમ બંગાળમાં 32.70% અને સૌથી ઓછું મહારાષ્ટ્રમાં 15.93% હતું. પશ્ચિમ બંગાળની બેરકપુર સીટ પરથી ભાજપના ઉમેદવાર અર્જુન સિંહે ટીએમસીના ઉમેદવાર પાર્થ ભૌમિક પર પૈસાની વહેંચણીનો આરોપ લગાવ્યો છે. તેમણે ચૂંટણી પંચને પણ ફરિયાદ કરી છે. ઉત્તર પ્રદેશના મહોબામાં ડ્યૂટી દરમિયાન CRPFના એક જવાનનું મોત થયું હતું. પશ્ચિમ બંગાળના બેરકપુરથી ભાજપના ઉમેદવાર અર્જુન સિંહ અને ટીએમસી સમર્થકો વચ્ચે ઘર્ષણ થયું છે.

મુંબઈમાં કેન્દ્રીય મંત્રી પીયૂષ ગોયલ ઉપરાંત અભિનેતા અક્ષય કુમાર, રાજકુમાર રાવ, જાહ્નવી કપૂર, સાન્યા મલ્હોત્રા, ફરહાન અખ્તર, RBI ગવર્નર શક્તિકાંત દાસ અને અનિલ અંબાણીએ મતદાન કર્યું હતું.

આ તબક્કામાં રાજનાથ સિંહ, સ્મૃતિ ઈરાની અને પીયૂષ ગોયલ સહિત 9 કેન્દ્રીય મંત્રીઓ મેદાનમાં છે. વાયનાડના સાંસદ રાહુલ ગાંધી પણ રાયબરેલીથી ચૂંટણી લડી રહ્યા છે. 2019માં ભાજપે સૌથી વધુ 32 સીટો, શિવસેનાને 7 અને TMC 4 સીટો જીતી હતી. કોંગ્રેસ યુપીની માત્ર રાયબરેલી સીટ જીતવામાં સફળ રહી હતી. અન્યને 5 બેઠકો મળી હતી.

ચૂંટણી પંચના જણાવ્યા અનુસાર પાંચમા તબક્કાની ચૂંટણીમાં 695 ઉમેદવારો મેદાનમાં છે. જેમાં 613 પુરુષ અને 82 મહિલા ઉમેદવારો છે. આમાં મહિલાઓ માત્ર 12% છે. એસોસિએશન ફોર ડેમોક્રેટિક રિફોર્મ (એડીઆર) અનુસાર, આ તબક્કામાં 615 ઉમેદવારોમાંથી 23% એટલે કે 159 ઉમેદવારો સામે ફોજદારી કેસ નોંધાયેલા છે. 543 લોકસભા સીટોના ​​ચોથા તબક્કા સુધી 380 સીટો પર મતદાન થયું છે. 20 મે સુધીમાં કુલ 429 બેઠકો પર મતદાન પૂર્ણ થશે. બાકીના બે તબક્કામાં 114 બેઠકો પર મતદાન થશે.

રાજ્યોમાં સવારે 11 વાગ્યા સુધી મતદાનની ટકાવારી

બિહાર – 21.11%

જમ્મુ અને કાશ્મીર – 21.37%

ઝારખંડ – 26.18%

લદ્દાખ – 27.87%

મહારાષ્ટ્ર – 15.93%

ઓડિશા – 21.07%

ઉત્તર પ્રદેશ – 27.76%

પશ્ચિમ બંગાળ – 32.70%