બિહારમાં વારંવાર તૂટી રહેલા પુલનો મામલો પહોંચ્યો સુપ્રીમ કોર્ટમાં, અપાયા તપાસનાં આદેશ

બિહારમાં પુલ તૂટી પડવાની ઘટનાઓમાં કોઈ ઘટાડો થવાના સંકેત દેખાઈ રહ્યા નથી. છેલ્લા 16 દિવસમાં કુલ 9 પુલ ધરાશાયી થયા છે. હવે આ મામલો સુપ્રીમ કોર્ટમાં પહોંચ્યો છે. કોર્ટમાં દાખલ કરાયેલી PILમાં હાલમાં અને તાજેતરના વર્ષોમાં બનેલા નાના-મોટા બ્રિજના તમામ સરકારી બાંધકામનું સ્ટ્રક્ચરલ ઓડિટ કરવાનો આદેશ કરવાની માગણી કરવામાં આવી છે. આ ઉપરાંત અરજીમાં એવું પણ કહેવામાં આવ્યું છે કે, ‘છેલ્લા 2 વર્ષમાં બે મોટા પુલ અને ઘણા નાના પુલ બનાવતાની સાથે જ અથવા બાંધકામ દરમિયાન તૂટી પડ્યા છે.’ અરજીમાં છેલ્લા બે વર્ષમાં પુલ પર બનેલી ઘટનાઓનો ઉલ્લેખ કરવામાં આવ્યો છે. અરજી અનુસાર બિહારમાં છેલ્લા બે વર્ષમાં 12 પુલ ધરાશાયી થવાની ઘટનાઓ બની છે.

સારણમાં પણ એક પુલ ધરાશાયી થયો હતો

જિલ્લા પ્રશાસનના અધિકારી પાસેથી મળેલી માહિતી અનુસાર, સારણમાં પણ 15 વર્ષ જૂનો પુલ ધરાશાયી થયો છે. તેમણે કહ્યું કે 15 વર્ષ પહેલા ભૂતપૂર્વ સ્થાનિક સત્તાવાળાઓ દ્વારા બનાવવામાં આવેલો પુલ આજે એટલે કે 4 જુલાઈની સવારે તૂટી પડ્યો હતો. રાહતની વાત એ છે કે આ ઘટનામાં કોઈ જાનહાનિ થઈ નથી. ગંડકી નદી પર બનેપુર બ્લોકમાં સ્થિત આ નાનો પુલ સારણના ઘણા ગામોને પડોશી જિલ્લા સિવાન સાથે જોડે છે. જિલ્લા વહીવટીતંત્રના અધિકારીએ જણાવ્યું કે પુલ તૂટી પડવાનું કારણ હજુ સુધી જાણી શકાયું નથી. તેના કારણો તપાસ બાદ બહાર આવશે.

ગઈકાલે સિવાનમાં બે પુલ ધરાશાયી થયા હતા

તમને જણાવી દઈએ કે ગઈકાલે જ બિહારના સિવાનમાં બે પુલ ધરાશાયી થયા હતા. ગઈ કાલે તૂટી પડેલા પુલમાંથી એક મહારાજગંજની દેવરિયા પંચાયતમાં અને બીજો પુલ મહારાજગંદ બ્લોકના નૌતન સિકંદરપુરમાં હતો. સ્થાનિક લોકોનું કહેવું છે કે આ બંને પુલ લાંબા સમયથી રિપેર ન થવાના કારણે તૂટી પડ્યા છે.