ભાજપના સ્પીકર..NDAના ડેપ્યુટી સ્પીકર! રાજનાથ સિંહના ઘરે યોજાયેલી બેઠકમાં નામો પર થઇ ચર્ચા
PM નરેન્દ્ર મોદીના નેતૃત્વમાં સતત ત્રીજી વખત NDA સરકાર બન્યા બાદ લોકસભા અધ્યક્ષના નામને લઈને ચર્ચા તેજ થઈ ગઈ છે. સૌથી પહેલા તો સવાલ એ થાય છે કે સ્પીકર પદ ભાજપ પાસે રહેશે કે એનડીએના ઘટક પક્ષો પાસે. આ અંગે એનડીએમાં હવે ચિત્ર સ્પષ્ટ થઈ રહ્યું છે. સૂત્રો પાસેથી મળેલી માહિતી મુજબ લોકસભાના સ્પીકર બીજેપીના હશે જ્યારે ડેપ્યુટી સ્પીકરનું પદ એનડીએના ઘટક પક્ષોને જઈ શકે છે. ભાજપ હાઈકમાન્ડે એનડીએ સાથી પક્ષો અને વિપક્ષો સાથે વાતચીત કરીને સર્વસંમતિ બનાવવાની જવાબદારી રક્ષા મંત્રી રાજનાથ સિંહને સોંપી છે. આ જ ક્રમમાં મંગળવારે સાંજે રક્ષા મંત્રીના ઘરે NDA નેતાઓની બેઠકમાં સ્પીકર અને ડેપ્યુટી સ્પીકર પદ પર ચર્ચા થઈ હતી.
તમને જણાવી દઈએ કે અગાઉની સરકારમાં ભાજપ પાસે સ્પષ્ટ બહુમતી હતી, તેથી NDAમાં સ્પીકર પદને લઈને કોઈ ઝઘડો નહોતો. ભાજપે ઓમ બિરલાને લોકસભાના સ્પીકર બનાવ્યા હતા. પરંતુ વર્તમાન સરકારમાં ભાજપ એનડીએના સાથી પક્ષો સાથે ચર્ચા કર્યા બાદ જ અંતિમ નિર્ણય લેવા માંગે છે.
બીજી તરફ વિપક્ષી પાર્ટી ઈન્ડિયા એલાયન્સની સીટોમાં વધારા સાથે 10 વર્ષ બાદ તેની પાસે લોકસભામાં વિપક્ષના નેતાનું પદ પણ હશે. અગાઉ, મુખ્ય વિરોધ પક્ષ પાસે વિપક્ષના નેતાનું પદ હાંસલ કરવા માટે પૂરતા સાંસદો નહોતા. તેથી વિપક્ષના નેતાનું પદ 10 વર્ષથી ખાલી હતું. 17મી લોકસભામાં ડેપ્યુટી સ્પીકરનું પદ પણ પાંચ વર્ષ સુધી ખાલી રહ્યું હતું. સામાન્ય રીતે તે વિરોધ પક્ષને આપવામાં આવે છે.