સૌરવ ગાંગુલી બનશે ભાજપના રાજ્યસભાના ઉમેદવાર! મિથુન ચક્રવર્તી પણ છે પ્રબળ દાવેદાર

પશ્ચિમ બંગાળમાં રાજ્યસભાની સાત બેઠકો માટે 24 જુલાઈએ મતદાન છે. સાત બેઠકોમાંથી એક બેઠક ભાજપના ખાતામાં જવાની ખાતરી છે. આ એક બેઠક માટે ભારતીય ક્રિકેટ ટીમના ભૂતપૂર્વ કેપ્ટન સૌરવ ગાંગુલી અથવા ભાજપના નેતા અને ફિલ્મ અભિનેતા મિથુન ચક્રવર્તીને નામાંકિત કરવામાં આવશે તેવી ચર્ચાઓ ચાલી રહી છે. પ્રાપ્ત માહિતી અનુસાર, બંગાળ ભાજપ દ્વારા કેન્દ્રીય નેતૃત્વને મોકલવામાં આવેલી યાદીમાં સૌરવ ગાંગુલી અને મિથુન ચક્રવર્તીના નામ સામેલ છે.

આ રાજ્યસભાની એક બેઠક માટે બંગાળ ભાજપ દ્વારા બે અલગ-અલગ યાદી દિલ્હીને મોકલવામાં આવી છે. એક યાદી ભાજપના પ્રદેશ અધ્યક્ષ સુકાંત મજુમદાર દ્વારા અને બીજી રાજ્યના વિપક્ષના નેતા શુભેંદુ અધિકારી દ્વારા મોકલવામાં આવી છે. જણાવી દઈએ કે શુભેન્દુ અધિકારી દ્વારા મોકલવામાં આવેલી યાદીમાં સૌરવ ગાંગુલીનું નામ છે. ભારતીય ક્રિકેટ ટીમના પૂર્વ કેપ્ટન ઉપરાંત રાજ્યસભાના પૂર્વ સાંસદ અને વર્તમાન ભાજપ નેતા મિથુન ચક્રવર્તી પણ આ યાદીમાં સામેલ છે. શુભેન્દુ અધિકારી દ્વારા કેન્દ્રીય નેતૃત્વને મોકલવામાં આવેલી યાદીમાં ભાજપની રાષ્ટ્રીય કાર્યકારી સમિતિના સભ્ય અનિર્બાન ગંગોપાધ્યાય અને ગ્રેટર કૂચ બિહાર પીપલ્સ એસોસિએશનના પ્રમુખ અનંત મહારાજનું નામ પણ છે.

જ્યારે, પૂર્વ રાજ્યસભા સાંસદ રૂપા ગંગોપાધ્યાય, સ્વપન દાસગુપ્તા, બીજેપીના બંગાળના પ્રવક્તા શમિક ભટ્ટાચાર્ય, પૂર્વ રેલ મંત્રી દિનેશ ત્રિવેદીનું નામ રાજ્ય બીજેપી અધ્યક્ષ સુકાંત મઝુમદાર દ્વારા મોકલવામાં આવેલી યાદીમાં સામેલ છે. જો કે, સુકાંત મજુમદાર અને શુભેન્દુ અધિકારીની યાદીમાં એક સામાન્ય નામ અનંત મહારાજનું છે.

રાજવંશી સમાજ પર અનંત મહારાજની ઘણી પકડ છે. ઉત્તર બંગાળમાં રાજબંશી સમુદાય ખૂબ જ પ્રભુત્વ ધરાવે છે અને વોટ બેંકની દૃષ્ટિએ પણ તે ખૂબ જ મહત્વપૂર્ણ છે. કેન્દ્રીય મંત્રી અમિત શાહ તેમના બંગાળ પ્રવાસ દરમિયાન અનંત મહારાજને મળ્યા હતા.