![](https://www.rakhewaldaily.com/wp-content/uploads/2024/06/petrol-1.png)
આવતીકાલથી આ રાજ્યમાં પેટ્રોલ અને ડીઝલ થશે મોંઘું, સરકારે VAT વધાર્યો, જાણો નવી કિંમત
ગોવા સરકારે શનિવારથી પેટ્રોલ અને ડીઝલ પર વેલ્યુ એડેડ ટેક્સ (વેટ) વધારવાની જાહેરાત કરી છે. રાજ્ય સરકારમાં અવર સચિવ (નાણા) પ્રણવજી ભટ્ટે શુક્રવારે આ વધારાની સૂચના જારી કરી હતી. તેમણે કહ્યું કે શનિવારથી પેટ્રોલ એક રૂપિયો અને ડીઝલ 36 પૈસા મોંઘુ થશે. અધિકારીએ જણાવ્યું કે, “વેટમાં વધારાનો અર્થ છે કે પેટ્રોલ અને ડીઝલના ભાવમાં અનુક્રમે 1 રૂપિયા અને 36 પૈસાનો વધારો થશે.” ગોવામાં પેટ્રોલની વર્તમાન કિંમત 95.40 રૂપિયા પ્રતિ લીટર છે. જ્યારે ડીઝલ 87.90 રૂપિયા પ્રતિ લીટર છે.
વિપક્ષ કોંગ્રેસ પાર્ટીના નેતાઓએ ગોવા સરકાર દ્વારા વેટમાં વધારાની ટીકા કરી છે. રાજ્યના વરિષ્ઠ નેતા યુરી અલેમાઓએ તેને અસંવેદનશીલ સરકારી નિર્ણય ગણાવ્યો હતો. તેમણે આ નિર્ણય પાછો ખેંચવાની માંગ કરી છે.
આ પહેલા કર્ણાટકમાં પેટ્રોલ અને ડીઝલ મોંઘુ થઈ ગયું હતું. કર્ણાટકમાં કોંગ્રેસની સિદ્ધારમૈયા સરકારે પેટ્રોલના ભાવમાં 3 રૂપિયા અને ડીઝલના ભાવમાં લગભગ 3.05 રૂપિયા પ્રતિ લિટરનો વધારો કરવાનો નિર્ણય લીધો હતો. સેલ ટેક્સમાં સુધારા બાદ આ વધારો થયો છે. જેના કારણે રાજ્યમાં પેટ્રોલના ભાવ 99.84 રૂપિયાથી 3 રૂપિયા વધીને 102.84 રૂપિયા પ્રતિ લીટર થયા છે. ડીઝલની કિંમત 85.93 રૂપિયાથી 3.02 રૂપિયા વધીને 88.95 રૂપિયા પ્રતિ લીટર થઈ ગઈ છે. પેટ્રોલિયમ ડીલર્સ એસોસિએશને આ વધારા માટે સુધારેલા સેલ્સ ટેક્સને જવાબદાર ગણાવ્યો છે. આ ટેક્સ પેટ્રોલ પર 25.92% થી વધીને 29.84% અને ડીઝલ પર 14.3% થી વધીને 18.4% થઈ ગયો છે.