CUET UG 2024 માં કરાયા મોટા ફેરફાર, હવે માત્ર 6 વિષયોને પસંદ કરવાનો મળશે વિકલ્પ, જાણો સંપૂર્ણ વિગત
રાષ્ટ્રીય પરીક્ષા એજન્સી દ્વારા ટૂંક સમયમાં CUET UG 2024 માટે નોંધણી પ્રક્રિયા શરૂ કરવામાં આવશે. કોમન યુનિવર્સિટી એન્ટ્રન્સ ટેસ્ટ-અંડરગ્રેજ્યુએટ 2024 (CUET UG 2024)માં પણ ઘણા ફેરફારો કરવામાં આવ્યા છે. પરીક્ષા હાઇબ્રિડ મોડમાં લેવામાં આવશે, જેથી ગ્રામ્ય વિસ્તારના ઉમેદવારોને ઘરની નજીક પરીક્ષા આપવાની સુવિધા મળી શકે. પરીક્ષા દરરોજ ત્રણ શિફ્ટમાં લેવામાં આવશે. CUET UG 2024 માટેની અરજી પ્રક્રિયા 19 ફેબ્રુઆરી સુધીમાં શરૂ થવાની સંભાવના છે.
મીડિયા રિપોર્ટ્સ અનુસાર, NTA અને UGCના વરિષ્ઠ અધિકારીઓના જણાવ્યા અનુસાર, CUET UGમાં આ વખતે ઘણા ફેરફારો થશે. આ પરીક્ષા 15 થી 31 મે દરમિયાન દેશભરમાં લેવામાં આવશે. ગયા વર્ષે, CUET UG માટે 28 લાખ ઉમેદવારોએ નોંધણી કરાવી હતી, જેમાંથી યુપીના ઉમેદવારોની સંખ્યા સૌથી વધુ હતી.
પરીક્ષા OMR શીટ પર લેવામાં આવશે
UGCના અધ્યક્ષ એમ જગદીશ કુમારે જણાવ્યું હતું કે ઉચ્ચ નોંધણી વિષયો માટેની પરીક્ષાઓ કમ્પ્યુટર આધારિત ટેસ્ટ (CBT) ફોર્મેટને બદલે OMR શીટ્સનો ઉપયોગ કરીને લેવામાં આવશે, ઇન્ડિયન એક્સપ્રેસે અહેવાલ આપ્યો છે. જે વિષયોમાં રજીસ્ટ્રેશન વધારે છે, પરીક્ષા બહુવિધ પસંદગીના ફોર્મેટમાં OMR શીટ પર લેવામાં આવશે. તેમણે કહ્યું કે અમે ઘણી શાળાઓ, કોલેજો અને શૈક્ષણિક સંસ્થાઓનો પરીક્ષા હોલ તરીકે ઉપયોગ કરીશું, તેનાથી ગ્રામીણ અને દૂરના વિસ્તારોના ઉમેદવારોને ફાયદો થશે.
પરીક્ષા કેટલી શિફ્ટમાં લેવાશે?
પરીક્ષા દરરોજ ત્રણ શિફ્ટમાં લેવામાં આવશે. સવારે 9 થી 11, બપોરે 12.30 થી 2 અને સાંજે 4 થી 5.30 સુધી. UCG પ્રમુખના જણાવ્યા અનુસાર, હાઇબ્રિડ મોડ પરીક્ષાના દિવસોની સંખ્યામાં પણ ઘટાડો કરશે.
વિદ્યાર્થીઓ 10ને બદલે માત્ર 6 વિષય પસંદ કરી શકશે
ઉમેદવાર પસંદ કરી શકે તેવા વિષયોની સંખ્યા 10 થી ઘટાડીને 6 કરવામાં આવશે. કુમારના જણાવ્યા મુજબ, NTA ડેટા દર્શાવે છે કે ઘણા વિદ્યાર્થીઓ તમામ 10 વિષય વિકલ્પો પસંદ કરી રહ્યા ન હતા. મોટી સંખ્યામાં વિકલ્પો હોવાના કારણે કેટલાક વિદ્યાર્થીઓને પરીક્ષા કેન્દ્ર ફાળવવામાં ટેકનિકલ મુશ્કેલીઓનો સામનો કરવો પડી રહ્યો હતો. તેમણે કહ્યું કે ડેટા દર્શાવે છે કે મોટાભાગના વિદ્યાર્થીઓ માત્ર 4 કે 5 પેપર આપતા હતા. આ વખતે CUET UGમાં અમે વિદ્યાર્થીઓને માત્ર 6 ટેસ્ટ પેપર આપવાની મંજૂરી આપીશું, જેમાં ત્રણ ડોમેન વિષયો, બે ભાષાઓ અને સામાન્ય પરીક્ષાનો સમાવેશ થશે.