બિહારમાં દારૂબંધીનાં વિરોધમાં પૂર્વ મુખ્યમંત્રી કહ્યું – કે હવે ગરીબો જાગી ગયા છે

Bihar News: બિહારના પૂર્વ મુખ્યમંત્રી જીતનરામ માંઝીએ ફરી એકવાર દારૂને લઈને વિવાદિત નિવેદન આપ્યું છે. જીતનરામ માંઝીએ કહ્યું છે કે જ્યારે ગરીબો થાક દૂર કરવા દવા તરીકે થોડો દારૂ પીવે છે, ત્યારે તેમને જેલમાં ધકેલી દેવામાં આવે છે. પરંતુ મોટા લોકો અને અધિકારીઓ રાત્રે 10 વાગ્યા પછી દારૂ પીવે છે ત્યારે તેમને કોઈ પકડતું નથી. જીતનરામ માંઝીએ કહ્યું કે દારૂબંધીના કારણે લોકો છૂપી રીતે મહુડાનો દારુ બનાવી રહ્યા છે, ગરીબ લોકો તેને પીને મરી રહ્યા છે. નશાબંધીના નામે તાડી વેચનારા અને પીનારાઓને જેલમાં ધકેલી દેવામાં આવે છે.

દારૂ પર માંઝીનું વિવાદાસ્પદ નિવેદન

તમને જણાવી દઈએ કે હિન્દુસ્તાની અવામ મોરચાએ બિહારના નવાદામાં એક ગરીબ જાહેર સભાનું આયોજન કર્યું હતું, જ્યાં જીતન રામ માંઝીએ કહ્યું હતું કે રાત્રે 10 વાગ્યા પછી જ્યારે મોટા લોકો અને અધિકારીઓ દારૂ પીવે છે ત્યારે તેમની સામે કોઈ કાર્યવાહી કરવામાં આવતી નથી. પરંતુ જો કોઈ ગરીબ વ્યક્તિ પોતાનો થાક દૂર કરવા માટે થોડો દારૂ પીવે તો તેને જેલમાં મોકલી દેવામાં આવે છે. મોટા માણસોને કોઈ પકડતું નથી.

માંઝીએ સાધ્યું નીતિશ પર નિશાન

ઉલ્લેખનીય છે કે, જાહેર સભામાં જીતનરામ માંઝીએ મુખ્યમંત્રી નીતિશ કુમાર પર પણ નિશાન સાધ્યું હતું. જીતન રામ માંઝીએ કહ્યું કે નીતીશ કુમાર તેમને મુખ્યમંત્રી બનાવવા અને રબર સ્ટેમ્પની જેમ કામ કરવા માંગતા હતા, પરંતુ ગરીબો માટેની તેમની યોજનાઓ રદ કરી દીધી.

લોકસભા ચૂંટણી પર કહી આ વાત

મુખ્યમંત્રી નીતીશ કુમાર પર કટાક્ષ કરતા જીતન રામ માંઝીએ કહ્યું કે જે લોકો અમારી પાર્ટીના વિલીનીકરણની વાત કરી રહ્યા છે તેમને સમજવું જોઈએ કે અમે કેટલા મજબૂત છીએ. તેમણે કહ્યું કે ગરીબો હવે જાગી ગયા છે. હવે અમે બેસવાના નથી. દરેક ગરીબ ઈચ્છે છે કે હું સાંસદ અને ધારાસભ્ય બનું. બિહારની જનતાએ મુખ્યમંત્રી નીતિશ કુમારને ફગાવી દીધા છે. 2024 અને 2025ની આવનારી ચૂંટણીમાં જનતા પણ આનો જવાબ આપવાનું કામ કરશે.