કરોડોનો ખર્ચો છતાં અયોધ્યાનાં રસ્તાઓ પર કેમ ભરાયું વરસાદી પાણી?, જાણો કારણ…

22 જૂને અયોધ્યામાં પ્રિ-મોન્સૂન વરસાદ શરૂ થયો હતો. આ વરસાદને કારણે રામપથમાં અનેક જગ્યાએ ખાડાઓ દેખાવા લાગ્યા છે. આ અંગે પીડબલ્યુડી વિભાગે હવામાનને જવાબદાર ઠેરવતા જણાવ્યું હતું કે 22 જૂનની રાત્રે 102 મીમી અને 25ની રાત્રે 176 મીમી વરસાદ નોંધાયો હતો. આ બે દિવસ અયોધ્યામાં ભારે વરસાદ પડ્યો હતો. તમને જણાવી દઈએ કે અયોધ્યામાં રામ પથ ગત વર્ષે જ બનાવવામાં આવ્યો હતો, આ રોડ બન્યા બાદ આ પહેલો વરસાદ હતો. હવે લોકો પ્રશ્ન કરી રહ્યા છે કે પહેલા વરસાદમાં જ આવી હાલત કેમ થઈ?

આ અંગે પીડબલ્યુડીના ઈજનેર ધ્રુવ અગ્રવાલે જણાવ્યું કે, આખા રામપથમાં ગટરલાઈન 6 થી 8 મીટર ઊંડી છે, જેના માટે ખાડો ખોદવામાં આવે છે, મોટી પાઇપ નાખવામાં આવે છે અને પછી મેનહોલ બનાવવામાં આવે છે, જેમાં રેતીનો ઉપયોગ કરવામાં આવે છે. અતિવૃષ્ટિને કારણે રેતી ભરાઈ ગઈ હતી અને ખાડાઓ સર્જાયા હતા જેનું હવે સમારકામ કરવામાં આવ્યું છે. જો કે, પ્રશ્ન એ છે કે અયોધ્યામાં પાણી ભરાવાની આવી સમસ્યા શા માટે છે?

હાલમાં અયોધ્યાનો પુનઃ વિકાસ કરવામાં આવી રહ્યો છે. નવા રસ્તા અને ગટર નાખવાની કામગીરી ચાલી રહી છે જેના કારણે નવા રસ્તા મકાનો અને દુકાનોના લેવલથી ઉપર બની ગયા છે. ઘરોના નાળા ગટર સાથે જોડાયેલા નથી જેના કારણે વરસાદી પાણીનો નિકાલ થઈ શકતો નથી.

અયોધ્યાના રિ-ડેવલપમેન્ટમાં કેટલા પૈસા ખર્ચાઈ રહ્યા છે?

યોગી સરકારે અયોધ્યાના વિકાસ માટે કુલ 57,136.21 કરોડ રૂપિયાનું બજેટ પસાર કર્યું છે. પ્રથમ તબક્કામાં રૂ. 240.89 કરોડનો ખર્ચ કરવામાં આવશે. 484 કરોડ રૂપિયા બીજા તબક્કામાં અયોધ્યાનો ચહેરો બદલી નાખશે. 37,394.55 કરોડ રૂપિયાનું બજેટ માત્ર રામનગરીમાં રસ્તા બનાવવા માટે ફાળવવામાં આવ્યું છે. જ્યારે જૂના રેલ્વે સ્ટેશનના પુનઃનિર્માણ માટે 140 કરોડ રૂપિયાનો ખર્ચ કરવામાં આવી રહ્યો છે. જો કે, અયોધ્યાના પીડબલ્યુડી વિભાગનો દાવો છે કે જે પણ પાણી ભરાયેલું હતું તે દૂર કરવામાં આવ્યું છે.